Іран закрыў Армузскі праліў для ўсіх суднаў
- 11.06.2026, 8:59
У адказ на масіраваны ўдар ЗША.
Іран закрыў праход праз Армузскі праліў для ўсіх суднаў пасля масіраванага ўдару ЗША па аб'ектах на тэрыторыі краіны, паведамляе CNN са спасылкай на цэнтральны штаб іранскай арміі. «У сувязі з нестабільнай абстаноўкай у рэгіёне Армузскі праліў абвяшчаецца закрытым для руху любых суднаў, уключаючы нафтавыя танкеры і гандлёвыя судны, і любы рух будзе абмежаваны», — гаворыцца ў заяве ўзброеных сіл. У ёй таксама адзначаецца, што пад удар ЗША трапілі «некаторыя паўднёвыя рэгіёны правінцыі Хормозган».
Уначы на 11 чэрвеня Цэнтральнае камандаванне (CENTCOM) Пентагона паведаміла пра пачатак авіяўдараў па Іране, якія «з'яўляюцца адказам на беспадстаўную і працяглую агрэсію» Тэгерана. Праз чатыры гадзіны ў CENTCOM заявілі пра завяршэнне атакі на іранскія аб'екты ваеннай разведкі і назірання, сістэмы сувязі і пазіцыі супрацьпаветранай абароны. У аперацыі былі задзейнічаны сілы марской пяхоты, ВПС і ВМС ЗША. Камандаванне падкрэсліла, што амерыканскія войскі застаюцца ў поўнай баявой гатоўнасці.
Напярэдадні прэзідэнт ЗША Дональд Трамп заявіў, што Тэгеран «робіць з нас дурняў» на перамовах. Ён падкрэсліў, што далей так працягвацца не можа. «Мы будзем атакаваць іх, атакаваць іх вельмі моцна», — сказаў Трамп у Авальным кабінеце.
Пасля гэтага кіраўнік Пентагона Піт Хегсет паведаміў журналістам пра падрыхтоўку «магутнага ўдару». «У Ірана ёсць шанец заключыць выдатную дамову. Аднак яны не выявілі такога жадання.
Амерыканскія бомбы будуць падаць на ключавыя аб'екты ў Іране адна за адной. Гэта робіцца не для таго, каб аднавіць вайну, а каб стварыць умовы для заключэння дамовы», — сказаў Хегсет.
Перад пачаткам чарговага вітка эскалацыі міністр энергетыкі ЗША Крыс Райт заявіў, што экспарт нафты праз Армузскі праліў апошнім часам вырас і будзе расці далей.
Аднак, па яго словах, спатрэбяцца многія месяцы, каб аднавіць экспарт энерганосьбітаў і крытычна важнай сыравіны пасля дасягнення дамовы з Іранам. Паводле паведамлення іранскага агенцтва Fars, Тэгеран захоўвае кантроль над пралівам. Пры гэтым іранскія ўлады сцвярджалі, што спаганяюць ад $1,5 млн да $2 млн з кожнага судна, якое перасякае праліў.