Навукоўцы: большасць людзей у натоўпе аддае перавагу рухацца супраць гадзіннікавай стрэлкі

• 11.06.2026, 14:41

Адкрыццё адбылося амаль выпадкова.

Калі чалавек ідзе, куды вочы глядзяць, дык, хутчэй за ўсё, даследчыкі дакладна прадкажуць траекторыю яго руху. Навукоўцы з Іспаніі, Японіі і Кітая высветлілі, што пераважная большасць людзей аддае перавагу хадзіць супраць гадзіннікавай стрэлкі, піша «Нож».

Адкрыццё адбылося амаль выпадкова. Падчас пандэміі даследчыкі захацелі праверыць, колькі людзей змяшчаецца ў бяспечнай замкнёнай прасторы — у такой, дзе ўсе захоўваюць сацыяльную дыстанцыю. Даследуючы відэазапісы з камер назірання, яны заўважылі, што многія людзі ў натоўпе перамяшчаюцца аднолькава.

Заканамернасць здзівіла навукоўцаў, і яны правялі асобныя эксперыменты ў Іспаніі і Японіі. У кожным з іх людзі самых розных узростаў рухаліся разам з натоўпам, пакуль схаваныя камеры і іншая тэхніка фіксавалі іх рухі.

Паводле высноў даследчыкаў, людзі схільныя рухацца супраць гадзіннікавай стрэлкі незалежна ад узросту, мясцовых звычаяў і іншых умоў. Пакуль спецыялістам не ўдалося растлумачыць прычыну гэтага феномену, але, здаецца, гэта можа быць нашай ураджонай асаблівасцю.

«У кожнага з нас ёсць невялікая асабістая схільнасць паварочваць у адзін бок, і калі шмат людзей знаходзяцца ў адной прасторы, гэтыя крошачныя зрухі складаюцца ў агульнае вярчэнне супраць гадзіннікавай стрэлкі», — удакладняе доктар Іньякі Эчэвэрыя Уартэ з Універсітэта Навары ў Іспаніі.

Паводле слоў навукоўцаў, цяпер яны працягнуць вывучаць рух людзей у натоўпе. Магчыма, у будучыні гэта прывядзе да больш значных адкрыццяў.