Анджэй Пачобут узнагароджаны Ганаровай адзнакай Падляшскага ваяводства

• 11.06.2026, 18:55

Гэта найвышэйшая ўзнагарода рэгіёна.

Журналіст і былы палітвязень Анджэй Пачобут быў узнагароджаны Ганаровай адзнакай Падляшскага ваяводства — найвышэйшай узнагародай рэгіёна. Пра гэта паведаміла «Радыё Рацыя».

Як адзначыў маршалак ваяводства Лукаш Прокорым, журналіст удастоены ўзнагароды за «прыклад гераізму, за прыклад барацьбы за незалежнасць, за праўду».

Прэзідэнт Беластока Тадэвуш Трускаляскі адзначыў, што Анджэй Пачобут можа ў любы момант стаць жыхаром горада.

Пачобут падзякаваў Беластоку і ваяводству за шматгадовае супрацоўніцтва і салідарнасць з Саюзам палякаў Беларусі.

Былы палітвязень і журналіст Анджэй Пачобут, знаходзячыся ў Беластоку, нагадаем, пацвердзіў, што плануе ў верасні вярнуцца ў Беларусь. Пачобут распавёў, што ён згадзіўся на выезд у Польшчу толькі пасля таго, як атрымаў гарантыі магчымасці вярнуцца дадому.

«Я хацеў бы вярнуцца дадому. Мой дом — у Гродне», — падкрэсліў ён.

Анджэй Пачобут быў затрыманы ў сакавіку 2021 года. У лютым 2023-га яго прысудзілі да васьмі гадоў калоніі.

З мая 2023 года ён адбываў пакаранне ў калоніі ў Наваполацку. У канцы красавіка 2026 года Пачобута вызвалілі ў выніку абмену і перадалі Польшчы.

3 мая прэзідэнт Польшчы Караль Навроцкі уручыў вызваленаму былому палітвязню Анджэю Пачобуту найвышэйшую дзяржаўную ўзнагароду — ордэн Белага Арла.