У Новай Баравой бацькі першакласнікаў сталі ў чаргу да новай школы

• 11.06.2026, 19:23

За суткі да прыёму заяў.

У Новай Баравой пад Мінскам некаторыя бацькі будучых першакласнікаў пачалі займаць чаргу каля школы яшчэ за суткі да афіцыйнага пачатку прыёму заяў, прызначанага на 12 чэрвеня, паведамляе дзяржаўная газета «Прысталічча». Ідзе гаворка пра новую школу №2, адкрытую два гады таму.

Як заяўляецца, у чарзе дзейнічаюць уласныя правілы: напрыклад, забаронена пакідаць сваё месца і прапускаць пераклічкі, каб не трапіць у спіс «мёртвых душ».

Падобная сітуацыя ў гэтым жылым раёне ўжо была некалькі гадоў таму, калі чэргі стаялі каля адзінай на той час школы №1.

У аддзеле адукацыі Мінскага раёна заяўляюць, што сэнсу ў такім ажыятажы няма. Маўляў, з 12 чэрвеня па 15 жніўня школы будуць прымаць заявы ад усіх дзяцей, замацаваных за адпаведнымі ўстановамі па месцы рэгістрацыі. У сувязі з гэтым загадзя праводзіліся сустрэчы з бацькамі, а неабходная інфармацыя размяшчалася на сайтах школ, у чатах і на інфармацыйных стэндах.

Адзначаецца, што сёлета школа №2 у вёсцы Копішча (тут якраз і размешчаны жылы раён Новая Баравая) гатовая прыняць 275 першакласнікаў, прычым усе яны будуць забяспечаныя месцамі ў групах падоўжанага дня. Школа №1 разлічвае на 153 новых вучняў. Тым не менш, гэтых месцаў на ўсіх усё роўна не хапае, таму бацькам прапаноўвалі разгледзець магчымасць навучання дзяцей у бліжэйшых школах Мінска, Бараўлянаў, Лескаўкі і Ляснога, калі гэта будзе ім зручна.

Вырашаць праблему недахопу месцаў у Новай Баравой плануюць шляхам павелічэння колькасці школ. Пасля адкрыцця другой школы на 1125 навучэнцаў цяпер будуюць яшчэ адну такую ж установу, якую плануюць увесці ў эксплуатацыю ў 2027 годзе.