Пуцінскі блогер абвінаваціў Лукашэнку ў здрадзе

• 12.06.2026, 19:53

Нечаканае адкрыццё.

Прарасійскі блогер заявіў, што ўкраінскія дроны ляцяць у Расію праз Беларусь.

Анатоль Шарый сцвярджае, што беларускія ўлады ведаюць пра выкарыстанне паветранай прасторы, але не ўмешваюцца, і гэта яшчэ адзін знак, што сітуацыя на фронце для Расіі пагаршаецца.

«Нам удалося пабываць у закрытым бункеры СПА Генштаба Мінабароны Расійскай Федэрацыі. Прааналізаваўшы палёты дронаў, мы прыйшлі да найпрасцейшай высновы: частка з іх ляціць праз тэрыторыю Беларусі. Гэта абсалютна дакладна. Яны сапраўды пралятаюць праз тэрыторыю Беларусі», — напісаў Шарый у сваім тэлеграм-канале.

Па словах блогера, у каментарыях яму пішуць, што «і так было зразумела», але для яго асабіста «гэта стала адкрыццём».

«Аказваецца, беларуская паветраная прастора даўно выкарыстоўваецца Украінай для таго, каб праз яе дроны ляцелі ў Расійскую Федэрацыю», — сцвярджае блогер і задаецца пытаннем, чаму так адбываецца.

Прапагандыст лічыць, што больш жорсткая рэакцыя Мінска магла б прывесці да непасрэднага ўступлення Беларусі ў вайну.

Шарый таксама адзначае, што становішча Масквы паступова пагаршаецца, «таму што з усіх бакоў адбываецца занадта шмат руху» і крытыкуе расійскія ўлады за адсутнасць «пэўнай рэакцыі на прыкметнае павелічэнне паставак узбраення і грошай на ўзбраенне» Украіне, у той час як «сітуацыя ўсё больш і больш нагнятаецца і пагаршаецца».

«План абсалютна ясны. Мы выдатна бачым, што робяць кіеўскія «дронаводы», калі яны б'юць па трасах і пачынаюць выводзіць з ладу масты. Думаю, у бліжэйшы час усе маленькія масты будуць разбітыя», — лічыць ён.