У Хоцімскім раёне два п'яныя трактарысты ехалі гусаком па дарозе

• 12.06.2026, 21:50

Іх спынілі інспектары ДАІ падчас патрулявання.

Інспектары ДАІ затрымалі ў Хоцімскім раёне двух вадзіцеляў сельскагаспадарчай тэхнікі, паведамляе Telegram-канал «Міліцыя Магілёўшчыны».

Як паказала асведчанне, мужчыны былі пад шафэ.

Падчас патрулявання інспектары заўважылі два трактары МТЗ, што ехалі гусаком па дарозе. Звычайная праверка зацягнулася — вадзіцелі выглядалі відавочна нецвярозымі.

У першага вадзіцеля алкатэст паказаў наяўнасць у выдыханым паветры 0,8 праміле этылавага спірту. Яго таварыш выпіў больш — у яго прыбор зафіксаваў 1,0 праміле.

Першаму трактарысту пагражае пазбаўленне права кіравання на тры гады і штраф у памеры 100 базавых велічынь, другому — хадзіць пешшу пяць гадоў і заплаціць 200 базавых велічынь.

У ДАІ нагадалі пра недапушчальнасць кіравання транспартнымі сродкамі ў стане ап'янення.

Нават невялікая доза алкаголю, падкрэслілі праваахоўнікі, рэзка зніжае каардынацыю і запавольвае рэакцыю, ператвараючы любую паездку ў смяротную пагрозу для навакольных.