Mercedes прадставіў новыя магутныя кросоверы

• 16.06.2026, 12:25

Флагманскія версіі GLE і GLS здольныя разганяцца да 280 км/г.

Абноўленую лінейку Mercedes GLE і GLS папоўнілі флагманскія версіі з рухавікамі AMG. Кросоверы здольныя развіваць хуткасць да 280 км/г.

Новыя Mercedes-AMG GLE 63 S і GLS 63 паступяць у продаж у другой палове гэтага года. Пра гэта паведамілі на сайце нямецкага аўтавытворцы.

Калі малодшыя мадэлі Mercedes-AMG GLE 53 і GLS 53 атрымалі шасціцыліндравы турбарухавік, то пад капот версій 63 вяртаецца 4,0-літровы V8 з падвойным турбанаддувам. Гэта рухавік новага пакалення з плоскім каленчатым валам, які развівае 612 к.с. і 850 Нм.

Разгон да 100 км/г займае 3,9 с у Mercedes-AMG GLE 63 S і 4,2 с — у GLS 63. Максімальная хуткасць абмежаваная на адзнацы 280 км/г. 48-вольтавая «мяккая» гібрыдная ўстаноўка знізіла выдатак паліва да 13,1–13,6 л на 100 км у Mercedes-AMG GLE 63 S і 13,4–13,7 л на 100 км — у GLS 63.

Акрамя таго, зараджаныя кросоверы Mercedes атрымалі больш гучны выхлап і спартыўны дыферэнцыял. Таксама ў іх арсенале — пераналаджаная пнеўмападвеска, актыўныя стабілізатары і павялічаныя тармазы.

Адрозніць новыя Mercedes-AMG GLS 63 і GLE 63 S можна па фірменнай шырокай рашотцы радыятара AMG, больш агрэсіўных бамперах і колавых дысках дыяметрам 22–23 цалі. Варыянт GLE даступны і ў фармаце купэ-кросовера.

У салоне ўсталяваныя спартыўныя сядзенні і руль. У аздабленні спалучаюцца скура і карбон, а на лічбавай прыборнай панэлі абноўленая графіка.