Эрфан Кудусаў: У акупантаў у Крыме нарастаюць праблемы

• 16.06.2026, 17:03

Расійскія войскі ўжо вымушаныя сыходзіць з асобных пазіцый.

Што ЗСУ ўжо ўдалося зрабіць падчас аперацыі па блакадзе акупаванага Крыму? Якія наступствы для расійскай групоўкі і акупацыйнай адміністрацыі ўжо бачны?

Такія пытанні сайт Charter97.org задаў вядомаму грамадскаму актывісту, аднаму з лідараў крымска-татарскага народа Эрфану Кудусаву:

— У цэлым сітуацыя развіваецца пазітыўна. Калі гэтая тэндэнцыя захаваецца, калі будзе павялічвацца і колькасць удараў ЗСУ, і іх накіраванасць, дакладнасць, калі будзе нарастаць магутнасць удараў, тады, вядома, праблемы з лагістыкай у акупацыйнай арміі будуць нарастаць. Яны ўжо нарастаюць.

Адно з наступстваў, пра якое ўжо паведамлялася, — гэта меркаваны выхад акупацыйных войскаў з Кінбурнскай касы. Акупанты сыходзяць і з некаторых востраваў насупроць Херсона, паміж Херсонам і акупаванымі Алежкамі. Яны не вытрымліваюць удараў ЗСУ, без лагістычнай падтрымкі, без прадуктаў і баекамплекту таксама пакідаюць некаторыя востравы. Пра гэта паведамляў камандзір 34-й брыгады марской пяхоты Дзмітрый Пулінец. Гэта ўсё вынік планамернай і нарастаючай працы Узброеных Сіл Украіны.

Сама сітуацыя ў Крыме ўсім, у прынцыпе, ужо вядомая. Гэта хранічныя перабоі з палівам. Яго ўжо не хапае і для акупацыйнай арміі, перыядычна адбываюцца сутычкі і з грамадзянскім насельніцтвам. Пакуль гэта ні ў што не перарасло, але тэндэнцыя ідзе не ў лепшы бок для расійскай акупацыйнай арміі. Таму ад ЗСУ мы чакаем толькі нарашчвання намаганняў, чакаем далёкіх удараў. Мэтаў у Крыме яшчэ пакуль, на жаль, хапае.

Знішчэнне мастоў з боку Чонгара, Генічэска і Генічэскай Горкі, плюс пашкоджанне мастоў у раёне Армянска, Краснаперакопска, ўездаў ад Каланчака і Чаплынкі, таксама пагоршыла становішча акупацыйных войскаў. Але пакуль транспарт у акупаваны Крым ідзе. Ён скараціўся прыкладна ў 3-4 разы, але грузы яшчэ ідуць.