Акцыі найбуйнейшых нафтавых кампаній Расіі ўпалі да 3-гадовых мінімумаў
- 16.06.2026, 18:23
«Дапамаглі» ўдары па НПЗ.
Індэкс «нафты і газу» Маскоўскай біржы, які ўключае акцыі 11 найбуйнейшых нафтагазавых кампаній, на таргах у аўторак апусціўся да найніжэйшай адзнакі з сакавіка 2023 года — 6081 пункт, вынікае з біржавых даных, перадае The Moscow Times.
Нягледзячы на ўзлёт нафтавых каціровак з-за вайны ў Іране, індэкс завяршыў зніжэннем 10 з апошніх 12 тыдняў, страціўшы 25% за апошнія тры месяцы і 15% з пачатку года.
На расійскую нафтавую галіну, якая застаецца галоўнай крыніцай экспартных даходаў для эканомікі, ціснуць моцны рубель, няздзейсненыя надзеі на зняцце санкцый, а таксама ўдары па НПЗ і перабоі з палівам на АЗС, пішуць аналітыкі «Вэктар Капітала». Мінулым годам налёты дронаў на нафтаперапрацоўчыя заводы каштавалі нафтаваму сектару каля 1 трлн рублёў страт. Сёлета іх колькасць павялічылася да рэкорду — 38 за студзень–май.
Акцыі «Раснафты» на таргах у аўторак упалі на 5,3%, а з пачатку года — на 15% і абнавілі мінімум з лютага 2023 года — 339,6 рубля за штуку. Мінулым годам чысты прыбытак кампаніі ўпэў у чатыры разы, а ў першым квартале бягучага года — на трэць. «Раснафце» давядзецца фарміраваць рэзервы з-за атак на вытворчыя аб’екты — НПЗ, рэзервуарныя паркі, перакачвальныя станцыі, — папярэдзіў 1 чэрвеня кіраўнік кампаніі Ігар Сечын.
Паперы «Лукойла» патаннелі на 5,8% у аўторак і на 14% з пачатку года, да мінімуму з мая 2023-га — 4485 рублёў. Звычайныя акцыі «Сургутнафтегаза», які ў мінулым месяцы быў вымушаны спыніць найбуйнейшы НПЗ «Кінеф» пад Піцерам, абнавілі мінімум з кастрычніка 2022 года — 18,055 рубля, страціўшы 17% з пачатку года. Амаль на 7% за дзень абрынуліся паперы «Татнафты», у якой напярэдадні спыніўся галоўны нафтаперапрацоўчы завод у Ніжнекамску.
«Атакі ўкраінскіх дронаў наносяць расійскаму нафтаваму сектару значныя выдаткі: парушаюць працу НПЗ, скарачаюць перапрацоўчыя магутнасці, павялічваюць выдаткі на рамонт і бяспеку, ствараюць вузкія месцы ў лагістыцы», — адзначае аналітык CREA Ісак Леві. Паводле ацэнак Energy Intelligence, у пачатку чэрвеня аб’ёмы нафтаперапрацоўкі ў Расіі ўпалі да мінімуму за 21 год — прастойвала трэцяя частка магутнасцяў НПЗ, або больш за 2 млн барэляў у суткі.
Пагадненне ЗША з Іранам, якое абяцае пакласці канец блакадзе Армузскага праліва, таксама цісне на акцыі нафтавых кампаній, адзначае аналітык БКС Кірыл Бахцін. За два дні цана нафты Brent ўпала амаль на 10% і ўпершыню з сакавіка трымаецца ніжэй за $80 за барэль. «Перыяд высокіх цэн на нафту, верагодна, падышоў да канца», — папярэджвае Бахцін.