СМІ: «Арэшнік» мае неўстранімны дэфект, з-за якога адхіляецца ад мэты на дзясяткі кіламетраў
- 16.06.2026, 19:53
Што вядома.
Балістычная ракета сярэдняй далёкасці РФ «Арэшнік» мае неўстранімны дэфект сістэмы навядзення і адхіляецца ад зададзеных каардынатаў на дзясяткі кіламетраў. Пра гэта паведаміла аналітычная кампанія Dallas Analytics са спасылкай на ўнутраную перапіску расійскіх абаронных прадпрыемстваў, перадае The Insider.
Як высветлілі аналітыкі, дэфект выкліканы гіраскапічным блокам ГУ-503 — савецкім авіяцыйным прыборам, які адаптавалі пад «Арэшнік». Прыбор выконвае ролю ўнутранага балансавальнага механізму ракеты і дазваляе кантраляваць яе становішча ў палёце, а адхіленне нават у паўградуса на гіпергукавой хуткасці прыводзіць да адхілення ад мэты на дзясяткі кіламетраў. Судзячы з ліста ад 18 сакавіка 2025 года, кампанія ААТ МЗП (Мічурынскі завод «Прагрэс») паведамляла заказчыку, што серыйная вытворчасць ГУ-503 спыненая, тэхналагічнае абсталяванне для яго наладкі і выпрабаванняў распрацавалі на пачатку 1970-х, яно «маральна састарэлае», многія кампаненты выйшлі са строю, а замяніць іх няма чым.
Паводле слоў аналітыкаў, нават пры наяўнасці камплектуючых заводы не могуць праверыць дакладнасць гіраскопа перад канчатковай зборкай. Як адзначае Dallas Analytics, з-за патрабавання расійскага дыктатара Пуціна аб сціснутых тэрмінах разгартавання «Арэшніка» стваральнікі цалкам адмовіліся ад кантролю якасці. Экспертыза абломкаў «Арэшнікаў», што ўпалі ва Украіне, выявіла на блоках ГУ-503 маркіроўку 2025 года — аналітыкі мяркуюць, што сучасную замену гіраскопу, якую прапаноўвалі распрацаваць у «Прагрэсе», так і не стварылі.
Dallas Analytics піша, што гэтыя праблемы могуць патлумачыць падзенне «Арэшніка» на гаражы ў Білай Цэркве ў маі 2026 года, пасля якога Пуцін быў вымушаны апраўдвацца, што расіяне зрабілі гэта спецыяльна «для зручнасці назірання за дакладнасцю». Пры гэтым дыктатар фактычна прызнаў, што ракета дагэтуль на стадыі выпрабаванняў, хоць раней казаў пра пачатак яе серыйнай вытворчасці.
«Гэта прамысловы гібрыд, сабраны з фрагментаваных кампанентаў, што належаць да зусім розных ракетных распрацовак, большасць з якіх існуе ўжо некалькі дзесяцігоддзяў… Гэта прадукт ізаляванага рэжыму, які маскіруе структурныя слабасці агрэсіўнымі пагрозамі эскалацыі. Расія застаецца нестабільным праціўнікам, чые некантралюемае ўзбраенне і палітычная воля ўяўляюць сабой глабальную пагрозу», — піша Dallas Analytics пра «Арэшнік».
12 чэрвеня Паветраныя сілы ЗСУ папярэдзілі пра высокую верагоднасць прымянення войскамі дзяржавы-агрэсара Расіі балістычнай ракеты сярэдняй далёкасці (БРСД) «Арэшнік».