Трамп заявіў, што Apple будзе вырабляць чыпы ў ЗША

• 18.06.2026, 18:28

Сумесна з Intel.

Прэзідэнт ЗША Дональд Трамп заявіў, што Apple згадзілася супрацоўнічаць з Intel у вытворчасці часткі сваіх чыпаў на тэрыторыі Злучаных Штатаў. Пра гэта паведамляе выданне MacRumors.

Пасля заявы Трампа акцыі Intel выраслі на 9% на перадбіржавых таргах, а акцыі Apple — на 0,6%. Афіцыйных каментарыяў ад кампаній наконт магчымага пагаднення пакуль не паступала.

Раней паведамлялася, што Apple і Intel дасягнулі папярэдняй дамоўленасці, у межах якой Intel зможа выпускаць працэсары для прылад Apple. Мяркуецца, што Intel будзе вырабляць чыпы паводле праектаў Apple па той жа мадэлі кантрактнай вытворчасці, якую цяпер выкарыстоўвае тайваньская TSMC. Паводле звестак СМІ, гаворка можа ісці пра некаторыя працэсары пачатковага ўзроўню, уключаючы малодшыя чыпы серыі M, якія выкарыстоўваюцца ў асобных мадэлях iPad і Mac.

Адзначаецца, што раней Apple не разглядала Intel як вытворцу сваіх чыпаў праз тэхналагічнае адставанне кампаніі ад канкурэнтаў, уключаючы TSMC і Samsung, а таксама складаныя адносіны паміж дзвюма кампаніямі. Сітуацыя пачала змяняцца пасля прызначэння Ліп-Бу Тана генеральным дырэктарам Intel летась. Пасля змены кіраўніцтва кампанія засяродзілася на развіцці свайго вытворчага бізнесу.

Apple таксама імкнецца дыверсіфікаваць ланцужок паставак, бо цяпер TSMC застаецца адзіным вытворцам чыпаў Apple Silicon. Падчас апошняга дакладу аб фінансавых выніках генеральны дырэктар Apple Цім Кук паведаміў, што пастаўкі iPhone 17 былі абмежаваныя праз недахоп чыпаў A19 і A19 Pro, якія кампанія не змагла атрымаць у дастатковым аб’ёме ад TSMC.