На аўкцыён трапіла культавая праца Бэнксі

• 21.06.2026, 4:57

«Кідальніка кветак» ацанілі ў $7 млн.

На таргі сучаснага мастацтва, якія аўкцыённы дом Sotheby’s правядзе 24 чэрвеня ў Лондане, трапіла адна з самых вядомых прац брытанскага стрыт-арт-мастака Бэнксі, заўважыў Office Life.

Гаворка пра «Кідальніка кветак». У карціны ёсць і іншая назва — «Каханне лунае ў паветры».

Першая версія працы — гэта графіці, якое з’явілася ў 2003 годзе ў Віфлееме пасля будаўніцтва сцяны, што аддзяляе Ізраіль ад Заходняга берага ракі Іардан.

Бэнксі адлюстраваў мужчыну ў масцы, які замахнуўся букетам на нябачнага ворага.

Выява стала культавай і адной з найбольш тыражаваных сярод прац мастака.

Якую версію прадаюць

Бэнксі сам неаднаразова паўтараў гэтую карціну ў розных варыяцыях. На гэтыя таргі трапіла версія 2011 года памерам 2,1 на 2,1 метра.

Як адзначаюць спецыялісты, яна вылучаецца «незвычайным напружаннем паміж жывапіснымі і механічнымі элементамі». Выява зробленая ў змешанай тэхніцы: кідальніка мастак намаляваў з дапамогай трафарэта, а букет кветак напісаў у класічнай тэхніцы ўручную алейнымі фарбамі.

Гэта праца прайшла шлях ад прыватнай калекцыі ў Сан-Францыска да музея Comden Contemporary у Лос-Анджэлесе, пасля чаго апынулася ў цяперашняга неназванага ўладальніка.

Аўкцыённы дом Sotheby’s ацаніў гэтую версію працы ў $4,6–7,2 млн. Яе аўтэнтычнасць пацвердзіла Pest Control. Кампанія лічыцца адзіным афіцыйным прадстаўніком мастака і займаецца яго аўтарскімі правамі.

Дарэчы, гэтую карціну ў іншай версіі ўжо прадавалі з аўкцыёну. Тады за копію «Кідальніка кветак», датаваную 06.05.05, памерам 90 на 90 сантыметраў заплацілі $12,9 млн, хаця першапачаткова яе ацэньвалі ў $3–5 млн.