«Ён кіруе нагамі?»: на трасе пад Гроднам заўважылі дзіўнага вадзіцеля

• 24.06.2026, 11:54

Відэафакт.

Сучасныя аўтамабілі абсталяваныя вялікай колькасцю электронных асістэнтаў. Поўнавартасным аўтапілотам іх назваць нельга, але ў цэлым па трасе аўтамабіль у добрай камплектацыі можа ехаць амаль без удзелу чалавека: і паласу ўтрымае, і хуткасць падтрымае, і прытармозіць пры неабходнасці.

Пры гэтым усё гэта не адмяняе таго, што вадзіцель павінен уважліва сачыць за абстаноўкай і быць гатовы адразу ж адрэагаваць на сітуацыю. Але, відаць, так лічаць не ўсе.

Вось і чытач newgrodno.by на трасе пад Гроднам звярнуў увагу на дзіўную манеру язды белага кросовера. Прычына аказалася ў вадзіцелі: ён проста адпачываў за рулём.

— Падалося, што ён кіруе нагамі. Закінуў іх на прыборную панэль. Сам мужчына моцна адкінуўся ў крэсле, а ў руках трымаў тэлефон. Наўрад ці ён мог у гэты час адэкватна ацэньваць дарожную абстаноўку, — расказаў аўтар відэа.

Праўда, знайсці ў правілах прамую забарону на тое, што вадзіцелю нельга закідваць ногі на руль, журналістам партала не ўдалося. Хаця тым жа матацыклістам забаронена прыбіраць рукі ад руля. Але тэлефон у руках — гэта дакладнае парушэнне. Ды і ў цэлым, паводле ПДР, вадзіцель абавязаны не здзяйсняць дзеянняў, якія адцягваюць яго ад кіравання транспартным сродкам.