У Крыме масава закрываюцца АЗС

• 24.06.2026, 21:12

Расійскія акупанты абмежавалі перавозку паліва праз Крымскі мост.

З 23 чэрвеня акупацыйныя ўлады ў Крыме павялічылі ліміт перавозкі паліва на аўтамабілі праз Крымскі мост удвая — да 200 літраў.

Пра гэта гаворыцца ў паведамленнях акупацыйных уладаў у сацыяльных сетках і выданні «Крым.Рэаліі».

Падкрэсліваецца, што абмежаванні датычаць аб’ёмаў, якія перавышаюць умяшчальнасць паліўнага бака, у прыватнасці бензіну і дызельнага паліва ў каністрах, а таксама вады і іншых вадкасцяў.

Раней праз Крымскі мост дазвалялася перавозіць не больш за 100 літраў вадкасцяў (у прыватнасці бензіну і дызельнага паліва ў каністрах).

У мясцовых пабліках паведамляюць, што на выездзе з Крыма ў раёне Керчы ў чарзе стаяць 702 аўтамабілі. Час чакання перавышае дзве гадзіны.

Чаргаў на ўезд у Крым няма.

Выданне «Крым.Рэаліі» са спасылкай на супрацоўніка паліўнай кампаніі ATAN, які размаўляў на ўмовах ананімнасці, піша, што ў Крыме масава закрываюцца АЗС. Паводле яго слоў, з-за сітуацыі з пастаўкамі паліва масава закрываюцца аўтазаправачныя станцыі нават такіх буйных кампаній, як ТЭС і ATAN.

Паводле агучанай ім інфармацыі, гэты працэс будзе працягвацца, бо ў перспектыве чакаецца толькі пагаршэнне сітуацыі з пастаўкамі паліва ў Крым.

«Яшчэ на мінулым тыдні многія АЗС, хоць і без паліва, але працягвалі працаваць, а аўтамабілісты яшчэ сумна жартавалі: маўляў, у „вас на табло ўвесь бензін па нулю рублёў — значыць, бясплатна“! Але з гэтага тыдня нам ужо не да смеху — пачалі масава закрывацца АЗС па ўсім Крыме, супрацоўнікаў адпраўляюць — каго ў неаплатныя адпачынкі, каго звальняюць. Усе паліўныя кампаніі ў Крыме нясуць велізарныя страты, таму адбываецца аптымізацыя выдаткаў. Падобна, што паліўны голад у Крыме надоўга», — пракаментаваў сітуацыю супрацоўнік ATAN.