Краснадарскі край РФ атакавалі дроны: гарыць нафтабаза «Палтаўская»

• 25.06.2026, 8:01

Яе магутнасці налічваюць каля 28 рэзервуараў.

Краснадарскі край РФ абстралялі беспілотнікі, у выніку на тэрыторыі нафтабазы «Палтаўская», якая з’яўляецца стратэгічнай для рэгіёна, ўспыхнуў пажар.

Пра гэта паведамляе РБК-Украіна са спасылкай на OSINT-каналы.

Факт здарэння на нафтабазе пацвердзіў у ноч на 25 чэрвеня кіраўнік Краснаармейскага раёна Аляксандр Харытонаў. У расійскім мэсэнджары «Макс» ён напісаў, што на нафтабазу ўпалі абломкі збітага дрона.

«У выніку падзення абломкаў БПЛА на Палтаўскай нафтабазе адбылося ўзгаранне. На месцы працуюць экстрэнныя і аператыўныя службы», — перадаюць OSINT-каналы словы чыноўніка.

Харытонаў дадаў, што рух па аўтадарозе, якая злучае станіцу Палтаўскую і хутар Трудобелікаўскі, часова перакрыты.

Губернатар Краснадарскага краю Веніямін Кандрацьеў, прынамсі на афіцыйным канале ў Telegram, нічога не напісаў пра тое, што адбылося.

Вядома, што нафтабаза «Палтаўская» з’яўляецца рэгіянальным аб’ектам паліўнай інфраструктуры, які забяспечвае пастаўкі паліва для часткі Краснадарскага краю і Рэспублікі Адыгея. Рэзервуарны парк налічвае каля 28 рэзервуараў.