Першы электрамабіль Ferrari раскупілі насуперак хвалі крытыкі

• 29.06.2026, 16:18

Камерцыйны поспех чакаў італьянскую марку ў Кітаі.

Першы поўнасцю электрычны аўтамабіль Ferrari — Luce — апынуўся камерцыйным поспехам у Кітаі, нягледзячы на хвалю крытыкі дызайну і высокі кошт. Паводле даных CarNewsChina, усе 88 аўтамабіляў, выдзеленых для кітайскага рынку, былі распрададзеныя практычна адразу пасля пачатку продажаў, піша Autoblog (пераклад — сайт Charter97.org).

У Кітаі Ferrari Luce ацанілі ў 3,988 млн юаняў (каля 587 тысяч долараў), што прыблізна на 7% танней за еўрапейскую цану. Пры гэтым мадэль выйшла на рынак у няпросты для брэнда момант — доля Ferrari ў Кітаі скарачаецца на фоне імклівага росту мясцовых вытворцаў электрамабіляў.

Галоўным канкурэнтам называюць BYD Yangwang U9. Кітайскі электрычны суперкар каштуе крыху больш за 260 тысяч долараў, развівае 1287 конскіх сіл і разганяецца да 100 км/г за 2,36 секунды, тады як Ferrari Luce выдае каля 1037 конскіх сіл і дасягае першай «сотні» за 2,5 секунды.

Тым не менш пакупнікі зрабілі выбар на карысць італьянскай маркі. Эксперты адзначаюць, што для кліентаў Ferrari ключавую ролю адыгрываюць не толькі тэхнічныя характарыстыкі, але і прэстыж брэнда, эксклюзіўнасць і статус уладальніка.

Цяпер галоўным выпрабаваннем для новай мадэлі стануць першыя пастаўкі і незалежныя агляды. Менавіта яны пакажуць, ці апраўдае Ferrari Luce высокую цікавасць пакупнікоў і ці здолее развеяць сумненні, што ўзніклі пасля прэм’еры.