Кітай «настойліва» заклікаў Пуціна вярнуцца да перамоваў
- 30.06.2026, 10:21
І «прадэманстраваць сапраўдную палітычную волю».
Пекін «настойліва» заклікае Маскву і Кіеў аднавіць перамовы па завяршэнні вайны, заявіў намеснік пастаяннага прадстаўніка Кітая пры Арганізацыі Аб’яднаных Нацый Сунь Лэй, піша The Moscow Times.
«Настойліва заклікаем як мага хутчэй пакласці канец канфлікту. Настойліва заклікаем таксама аднавіць перамовы, прадэманстраваць сапраўдную палітычную волю і зрабіць усё, каб выкараніць першапрычыны гэтага канфлікту шляхам поўнага і безагаворачнага выканання прынцыпаў Статута ААН», — сказаў Лэй на пасяджэнні Савета Бяспекі ААН.
Прадстаўнік Кітая таксама адзначыў, што ваенны канфлікт усё мацней закранае цывільную прастору. «Ад гэтага церпяць ні ў чым не вінаватыя мірныя жыхары», — падкрэсліў Сунь Лэй. Ён дадаў, што Кітай захоўвае «аб’ектыўную і бесстароннюю» пазіцыю па ўкраінскім пытанні, падтрымлівае кантакты з усімі бакамі і «нястомна» садзейнічае мірным перамовам. «Разам з міжнароднай супольнасцю Кітай гатовы і далей адыгрываць канструктыўную ролю ў прасоўванні палітычнага ўрэгулявання крызісу», — падсумаваў Лэй.
Уладзімір Пуцін за апошні тыдзень двойчы заявіў пра гатоўнасць вярнуцца да перамоваў аб завяршэнні вайны ва Украіне. 23 чэрвеня ён прапанаваў аднавіць дыялог на аснове стамбульскіх дамоўленасцяў, а таксама з улікам мадальнасцяў, якія абмяркоўваліся ў Анкорыджы з прэзідэнтам ЗША Дональдам Трампам, і «рэалій на зямлі». 28 чэрвеня ў інтэрв’ю крэмлёўскаму карэспандэнту Паўлу Зарубіну Пуцін падкрэсліў, што гатовы абмяркоўваць з амерыканскімі прадстаўнікамі «ўсе дэталі, усе мадальнасці» для ўрэгулявання канфлікту.
Разам з тым Пуцін расказаў пра прапанову Кіева адмовіцца ад удараў па тэрыторыі адзін аднаго і абмежаваць ваенныя дзеянні ў межах Херсонскай і Запарожскай абласцей, а таксама так званых «ДНР» і «ЛНР». Пуцін даў зразумець, што ён на гэта не згодны, бо, паводле ягоных слоў, падобныя крокі дадуць перавагу ўкраінскай арміі. Ён дадаў, што галоўная задача для расійскіх войскаў і для яго — «канчатковае вызваленне Данбаса і Наварасіі».