ISW злавіў Пуціна на хлусні

• 30.06.2026, 12:19

Амерыканскія аналітыкі разабралі інтэрв’ю кіраўніка Крамля з картамі.

Расійскі дыктатар Уладзімір Пуцін у нядаўнім інтэрв’ю прапагандысту Паўлу Зарубіну агучыў новую порцыю істотна перабольшаных заяваў пра прасоўванне акупацыйных войскаў РФ ва Украіне, якія не адпавядаюць рэаліям на полі бою — у прыватнасці, у раёне Канстанцінаўкі, Добрапольля, Купянска.

Пра гэта пішуць у сваёй справаздачы спецыялісты Інстытута вывучэння вайны. Яны падрабязна прааналізавалі заявы Пуціна ў інтэрв’ю Зарубіну, якое было апублікавана 28 чэрвеня і ў якім дыктатар спрабаваў прасоўваць наратыў пра «поспехі» расіян па ўсёй лініі фронту.

Аналітыкі ISW падкрэсліваюць, што гэтыя заявы Пуціна «накіраваныя на тое, каб ілжыва прадставіць пазіцыю Расіі на полі бою такой жа — калі не лепшай — чым яна была падчас саміту ЗША–Расія на Алясцы ў жніўні 2025 года». Аднак насамрэч з таго часу сітуацыя на полі бою «рэзка змянілася», рэзюмуюць аўтары справаздачы.

Пуцін заявіў Зарубіну, што расійскія войскі, маўляў, хутка прасоўваюцца практычна на ўсіх участках лініі фронту, а ўкраінскія ўдары, нібыта, «абсалютна» не ўплываюць на аперацыі Расіі на перадавой. Пры гэтым ён галоўным чынам узгадваў баі за гарады і населеныя пункты ў Данецкай вобласці, сярод якіх Ліман, Славянск, Краматорск, Канстанцінаўка і Добрапольле. Аднак аналітыкі ISW абверглі тыя лічбы, якімі дыктатар абгрунтоўваў свае тэзісы.

У прыватнасці, Пуцін сцвярджаў, што акупанты амаль цалкам захапілі Ліман; увайшлі ў Мікалаеўку (вёска на ўсход ад Славянска) і знаходзяцца прыкладна за 8−9 км ад Славянска; за 4 км — ад Краматорска. Са свайго боку ISW на падставе геалакацыйных даных ацэньвае, што расійскія войскі захоўваюць прысутнасць (шляхам прасоўвання або інфільтрацыі) толькі на 4,3% тэрыторыі Лімана; знаходзяцца на адлегласці да 12 км ад Мікалаеўкі, 19 км ад Славянска і 14 км ад Краматорска.

Пуцін таксама сцвярджаў, што расійская групоўка войскаў «Поўдзень» нібыта захапіла 96% Канстанцінаўкі, а падраздзяленні расійскай 6-й матастралковай дывізіі абышлі Канстанцінаўку і ўвайшлі ў Аляксеева-Дружкоўку (населены пункт паміж Канстанцінаўкай і Дружкоўкай). У той жа час ацэнка ISW фіксуе прысутнасць акупантаў (прасоўванне або інфільтрацыя) толькі на 36,98% тэрыторыі горада Канстанцінаўка. Пры гэтым расійскія захопнікі не забяспечылі кантроль над гэтымі раёнамі горада і не ўсталявалі там устойлівых пазіцый, адзначаюць спецыялісты. Аналітыкі таксама падкрэсліваюць, што расіяне знаходзяцца за 7 км ад Аляксеева-Дружкоўкі.

Пуцін заявіў, што акупанты з групоўкі войскаў «Цэнтр» нібыта ўвайшлі ў Добрапольле і Ганнаўку (населены пункт на паўночны ўсход ад Добрапольля). Ён таксама спрабаваў сцвярджаць, што на поўнач ад Добрапольля Сілы абароны Украіны, нібыта, не маюць «загадзя падрыхтаваных абарончых рубяжоў» [гэты тэзіс выклікаў здзіўленне нават у расійскіх «ваенкораў» — рэд.]. У той жа час ISW зафіксаваў геалакацыйныя даныя пра тое, што расійскія войскі наблізіліся на адлегласць да 7 км ад Ганнаўкі і Добрапольля, але не ўвайшлі ў гэтыя населеныя пункты.

Расійскі дыктатар таксама пагражаў Украіне стратай тэрыторый у Сумскай вобласці, заявіўшы, што акупанты працягваюць пашыраць «буферную зону» на поўначы рэгіёна і знаходзяцца за 10,5 км ад горада Сумы. Аднак ISW зафіксаваў прысутнасць расійскіх інфільтрацыйных груп за 13 км ад Сум, а агульнае прасоўванне расійскіх войскаў — на адлегласць да 17 км ад горада.

Што да Купянска і Купянска-Вузлавага, то Пуцін працягвае адмаўляцца прызнаваць паспяховыя ўкраінскія контратакі ў гэтым раёне напрыканцы 2025 года. Пуцін сцвярджаў, што расійскія войскі знаходзяцца на адлегласці ад 2,5 да 5 км ад заходняй мяжы Купянска — у ISW мяркуюць, што ён меў на ўвазе прасоўванне акупантаў за межы горада. Аднак насамрэч Сілы абароны Украіны вызвалілі значную частку Купянска і яго наваколляў у канцы снежня 2025 года, і з таго часу расіяне спрабуюць вярнуць сабе тэрыторыю ў гэтым раёне. Аналітыкі Інстытута вывучэння вайны зафіксавалі пацверджаныя геалакацыяй доказы, якія дазваляюць ацаніць, што расійскія войскі цяпер прысутнічаюць на 2,39% тэрыторыі Купянска і 2,77% тэрыторыі Купянска-Вузлавага, пры гэтым акупанты не ўтрымліваюць ніякіх кансалідаваных пазіцый ні ў адным з гэтых гарадоў.

Аналагічным чынам спецыялісты ISW абверглі і заявы Пуціна пра нібыта блізкае акружэнне ўкраінскіх сіл на левым беразе ракі Аскол (якую Пуцін памылкова назваў Старым Асколам, хоць гэта населены пункт у самой РФ — рэд.). Пуцін сцвярджаў, што расійскія войскі ціснуць на ўкраінскую групоўку колькасцю 5 тыс. вайскоўцаў з усходу, поўначы і поўдня і што да завяршэння акружэння акупантам, маўляў, засталося ўсяго 2 км. Аднак ISW не знайшоў ніякіх доказаў таго, што расійскія войскі пагражаюць акружыць украінскіх абаронцаў у напрамку Баравой або блізкія да таго, каб дасягнуць ракі Аскол у гэтым раёне.

Пуцін таксама паспрабаваў аспрэчыць прасоўванне Сіл абароны Украіны на поўдні ў 2026 годзе. «Кажуць і пра поспехі ЗСУ на полі бою па вызваленні тэрыторый. Узнікае пытанне: дзе гэта і якіх тэрыторый?» — саркастычна заявіў дыктатар. На мапе ніжэй спецыялісты ISW адказалі дыктатару на гэтае пытанне, нагадаўшы, што ўкраінскія войскі вызвалілі:

больш за 400 кв. км тэрыторыі на Аляксандраўскім напрамку з 1 студзеня 2026 года;

значную частку Купянска ў канцы 2025 года;

некалькі населеных пунктаў у Запарожскай вобласці з канца красавіка 2026 года.

У ISW нагадваюць, што ўкраінскія войскі таксама разгарнулі «вельмі ўдалую» кампанію сярэдне- і дальнабойных удараў па расійскіх вайсковых аб’ектах і нафтавай інфраструктуры, «што аказвае каскадны ўплыў на лагістыку і аперацыі Расіі на полі бою, а таксама выклікае дэфіцыт бензіну і эканамічную напружанасць па ўсёй Расіі і на акупаваных тэрыторыях Украіны». У той жа час тэмпы прасоўвання Расіі істотна запаволіліся: расійскія войскі прасоўваліся ў сярэднім на 3,79 кв. км у дзень у чэрвені 2026 года ў параўнанні са сярэднім паказчыкам 16,65 кв. км у дзень у жніўні 2025 года.

«Пуцін канструюе гэты наратыў пра „поспехі“ на полі бою, каб схаваць нарастаючую ўнутраную напружанасць, з якой сутыкаецца Расія праз украінскую кампанію дальнабойных удараў», — рэзюмуе ISW.

Эксперты Інстытута вывучэння вайны таксама агучылі наступныя дадатковыя высновы адносна заяваў дыктатара ў інтэрв’ю Зарубіну:

Пуцін дбайна канструюе рэальнасць, якая паказвае перамогу Расіі ва Украіне як нібыта непазбежную, адначасова прымяншаючы рэальныя эканамічныя страты ад вайны. Гэта сканструяваная псеўдарэальнасць грунтуецца на ігнараванні тактычных і аператыўных рэалій поля бою станам на 2026 год і на пастаяннай прыхільнасці Расіі непрымальным максімалісцкім мэтам, падкрэсліваюць аналітыкі. «Кантроль Пуціна над інфармацыйнай прасторай і яго здольнасць фарміраваць і распаўсюджваць наратывы пра расійскі ваенны поспех маюць вырашальнае значэнне для падтрымання гэтай ілжывой рэальнасці», — адзначае ISW.

Пуцін і іншыя расійскія чыноўнікі працягваюць публічна дэманстраваць сваю прыхільнасць першапачатковым ваенным мэтам Расіі. У інтэрв’ю Зарубіну дыктатар назваў галоўнай мэтай Расіі ў вайне «канчатковае вызваленне [захоп] Данбаса і Наварасіі».

Пуцін дэ-факта адхіліў нядаўнія новыя прапановы Украіны аб спыненні агню. У прыватнасці, у размове з Зарубіным ён сцвярджаў, што Украіна прапанавала Расіі ўзаемнае спыненне агню адносна дальнабойных удараў і спыненне агню на фронце па-за межамі Луганскай, Данецкай, Запарожскай і Херсонскай абласцей — то бок фактычнае спыненне баявых дзеянняў у Мікалаеўскай, Днепрапятроўскай, Харкаўскай і Сумскай абласцях. ISW адзначае, што гэта першы выпадак, калі Пуцін публічна агучыў такія ўкраінскія прапановы аб спыненні агню. Аднак Пуцін адразу ж адхіліў гэтыя прапановы, заявіўшы, што Расія, маўляў, не зацікаўленая ў наданні Украіне такога «выратавання». Такім чынам, гэта стала новым прыкладам таго, як менавіта Украіна ініцыюе, а Расія адхіляе магчымыя меры па спыненні вайны, адзначаюць у ISW.

Падобна, Пуцін прызнаў той факт, што саміт ЗША і Расіі на Алясцы ў жніўні 2025 года не прывёў да выразных або практычных дыпламатычных дамоўленасцяў. Пуцін, верагодна, прызнаў гэта, каб пазбегнуць прамой канфрантацыі з адміністрацыяй Трампа, мяркуюць у ISW. У той жа час дыктатар заявіў Зарубіну, што Расія гатовая працягваць перамовы з Злучанымі Штатамі на аснове саміту на Алясцы. Аднак гэтая заяўленая гатоўнасць Пуціна вярнуцца да перамоў накіраваная на тое, каб падштурхнуць ЗША да аднаўлення перамоў на ўмовах, быццам бы сітуацыя на полі бою не змянілася з жніўня 2025 года — што, як сведчаць прыведзеныя вышэй факты, не адпавядае рэчаіснасці, падкрэсліваюць аналітыкі ISW.