Беларус не змог выйсці на пенсію

• 30.06.2026, 13:35

З яго стажу «зніклі» чатыры гады.

У Глускім раёне мужчына вырашыў звярнуцца па датэрміновую пенсію, але высветлілася, што ніхто не можа пацвердзіць чатыры гады яго працоўнага стажу.

У 90-я гады мужчына чатыры гады працаваў на дрэваапрацоўчым камбінаце, які цяпер ужо ліквідаваны. Пацвердзіць гэты перыяд працы аказалася немагчымым праз адсутнасць асабовых рахункаў і недакладнасці ў працоўнай кніжцы.

У Магілёўскай абласной арганізацыі прафсаюза работнікаў лесу і прыродакарыстання вывучылі дакументы і сітуацыю. Адміністратыўнымі метадамі аднавіць звесткі складана, таму давядзецца звяртацца ў суд.

Суд можа ўстанавіць факт працы для ўключэння гэтага перыяду ў страхавы стаж, гэта дапаможа выйсці на пенсію і атрымаць належныя выплаты.