The Economist: Студэнты ВНУ ўсё часцей не спраўляюцца са заданнямі ўзроўню пачатковай школы

• 30.06.2026, 19:02

Даследаванне паказала сур'ёзнае зніжэнне пісьменнасці сярод студэнтаў.

Выкладчыкі вядучых універсітэтаў усё часцей заяўляюць пра рэзкае падзенне ўзроўню падрыхтоўкі першакурснікаў. Больш за 1,8 тыс. выкладчыкаў Каліфарнійскага ўніверсітэта падпісалі адкрыты ліст, у якім паведамілі, што частка студэнтаў не валодае нават базавай школьнай матэматыкай, з-за чаго выкладчыкам даводзіцца зноў тлумачыць матэрыял сярэдняй школы, піша The Economist (пераклад — сайт Charter97.org).

Праблему пацвярджаюць і даныя Арганізацыі эканамічнага супрацоўніцтва і развіцця (АЭСР). Згодна з даследаваннем, каля 8% студэнтаў ВНУ ў развітых краінах дэманструюць узровень матэматычнай і чытацкай пісьменнасці, супастаўны з навыкамі дзесяцігадовага дзіцяці. За апошняе дзесяцігоддзе частка такіх студэнтаў прыкметна павялічылася.

Асабліва трывожная сітуацыя назіраецца ў ЗША. Кожны сёмы студэнт паказвае мінімальны ўзровень чытацкай пісьменнасці, а амаль кожны пяты — матэматычнай. Пры гэтым выкладчыкі Гарварда і іншых прэстыжных універсітэтаў адзначаюць, што студэнтам становіцца ўсё складаней чытаць доўгія тэксты і канцэнтравацца.

Эксперты звязваюць пагаршэнне вынікаў з наступствамі пандэміі, змякчэннем патрабаванняў пры паступленні і распаўсюджваннем штучнага інтэлекту. Паводле брытанскага даследавання, 94% студэнтаў выкарыстоўваюць ШІ пры выкананні вучэбных прац, а частка з іх наўпрост устаўляе згенераваныя тэксты ў свае заданні.

Аўтары даследавання папярэджваюць, што адмова ад строгіх патрабаванняў і шырокае выкарыстанне ШІ могуць яшчэ мацней знізіць якасць вышэйшай адукацыі, калі ўніверсітэты не перагледзяць падыходы да ацэнкі ведаў і акадэмічных стандартаў.