У ЗША суд адмяніў гучны ўказ Трампа

• 30.06.2026, 19:43

Гэта другое падобнае рашэнне.

Вярхоўны суд ЗША адхіліў спробу прэзідэнта Дональда Трампа абмежаваць права на грамадзянства па нараджэнні. Гэта рашэнне стала другім выпадкам у гэтым годзе, калі суд прызнаў несапраўднай маштабную і гучную ініцыятыву Трампа, піша Reuters.

Рашэнне Вярхоўнага суда было прынята шасцю галасамі супраць трох. Суддзі пацвердзілі рашэнне ніжэйстаячага суда, які заблакаваў указ Трампа, што прадпісваў амерыканскім ведамствам не прызнаваць грамадзянства дзяцей, народжаных у Злучаных Штатах, калі ніводзін з бацькоў не з'яўляецца грамадзянінам ЗША або законным сталым рэзідэнтам, таксама вядомым як уладальнік «грын-карты».

Праціўнікі ўказа Трампа сцвярджалі, што ён парушае палажэнні 14-й папраўкі да Канстытуцыі ЗША, якая надае грамадзянства асобам, што нарадзіліся ў Злучаных Штатах і «падпадаюць пад іх юрысдыкцыю».

Гэта другое падобнае рашэнне — так, у лютым суд прызнаў незаконнымі ўведзеныя Трампам тарыфы на гандаль з дзясяткамі краін.