Лукашэнка вылецеў з Кітая

• 30.06.2026, 21:50

Дыктатар накіраваўся ў Інданезію.

Аляксандр Лукашэнка накіраваўся з афіцыйным візітам у Рэспубліку Інданезія, паведаміла 30 чэрвеня прэс-служба дыктатара.

Праграмай візіту запланаваныя перамовы з прэзідэнтам Інданезіі Прабова Субіянта у вузкім і пашыраным фарматах.

«Асобны акцэнт будзе зроблены на перспектывах развіцця адносін у гандлёва-эканамічнай і інвестыцыйнай сферах, па лініі гуманітарнага супрацоўніцтва», — адзначылі ў прэс-службе Лукашэнкі.

Чакаецца, што па выніках перамоваў будзе падпісаны шэраг міжнародных дакументаў. Галоўны з іх — дарожная мапа развіцця ключавых напрамкаў супрацоўніцтва паміж краінамі на найбліжэйшую пяцігодку.

Нагадаем, 28 чэрвеня Лукашэнка накіраваўся ў краіны Усходняй і Паўднёва-Усходняй Азіі. Паездка пачалася адразу пасля двухдзённых перамоваў у Расіі з дыктатарам РФ Уладзімірам Пуціным.

29 чэрвеня Аляксандр Лукашэнка сустрэўся ў Пекіне са старшынём Кітайскай Народнай Рэспублікі Сі Цзіньпінам. 30 чэрвеня узурпатар наведаў Пекінскі ўніверсітэт. У навучальнай установе адбылася цырымонія ўручэння дыпломаў выпускнікам першай сумеснай беларуска-кітайскай праграмы па спецыяльнасці «біятэхналогія». Сярод іх аказаўся і малодшы сын дыктатара Коля.