ЗША ўпершыню запусцілі супрацькарабельную ракету LRASM з бамбавіка B-2

• 1.07.2026, 3:14

Ракета здольная самастойна выяўляць і распазнаваць караблі праціўніка.

У ходзе маштабных вучэнняў Valiant Shield 2026 у Ціхім акіяне амерыканскі стратэгічны бамбавік B-2 Spirit упершыню ажыццявіў пуск супрацькарабельнай ракеты вялікай далёкасці AGM-158C LRASM. Баявы пуск адбыўся 27 чэрвеня паблізу Марыянскіх астравоў. Пра гэта паведамляе Army Recognition.

Мішэнню ракеты стаў спісаны дэсантны карабель USS Juneau ў Філіпінскім моры. Выпрабаванні праводзіліся ў рамках вучэбнага сцэнарыя SINKEX, які прадугледжвае паражэнне рэальных марскіх мэтаў для праверкі эфектыўнасці ўзбраення і ўзаемадзеяння розных падраздзяленняў.

Ракета LRASM здольная аўтаномна выяўляць і распазнаваць караблі праціўніка нават ва ўмовах актыўнай РЭБ. Яе далёкасць палёту ацэньваецца прыкладна ў 926 кіламетраў, што дазваляе самалётам запускаць яе па-за зонай дзеяння большасці карабельных сістэм СПА.

У вучэннях Valiant Shield 2026 таксама ўдзельнічаюць Японія, Аўстралія, Канада і Новая Зеландыя.