Літоўскія памежнікі дапамогуць латвійскім памежнікам на мяжы з Беларуссю

• 1.07.2026, 10:37

Лукашэнка атакуе балтыйскую краіну з дапамогай нелегалаў.

Літоўскія памежнікі зноў накіроўваюцца на дапамогу латвійскім калегам для ўзмацнення аховы межаў. З 1 ліпеня Служба аховы дзяржаўнай мяжы Літвы накіроўвае ў Латвію новую місію, у склад якой увайшлі дзевяць супрацоўнікаў, у тым ліку двух кінолагаў са службовымі сабакамі.

Паводле звестак ведамства, Латвія працягвае сутыкацца з сур'ёзным міграцыйным ціскам з боку Беларусі. Больш за тое, у бягучым годзе паказчыкі другаснай міграцыі з Латвіі падскочылі больш чым у чатыры разы.

На працягу двух тыдняў літоўскія спецыялісты будуць задзейнічаныя на найбольш складаных участках мяжы. Да іх абавязкаў увойдзе маніторынг прыгранічнай зоны, спыненне спроб незаконнага перасячэння мяжы і выкананне іншых аператыўных задач.