Bloomberg: Дзякуючы 6-тоннай «Фламінга» Украіна дасягнула прарыву ў вайне

• 1.07.2026, 15:17

Маштаб атак паказвае, як хутка выраслі магчымасці Кіева.

Выданне Bloomberg піша, што Украіна значна пашырыла радыус і інтэнсіўнасць ракетных удараў па тэрыторыі Расіі. Паводле дадзеных агенцтва, украінскія ракеты цяпер здольныя паражаць мэты амаль на палове расійскай тэрыторыі.

У маі ўкраінскія крылатыя ракеты «Фламінга» ўпершыню пераадолелі больш за 1 500 км і ўдарылі па заводзе ў Чэбаксарах. Пазней Украіна таксама паведамляла пра дальнія ўдары па расійскіх ваенных і прамысловых аб'ектах.

«Гэта азначае істотны прарыў у кампаніі Украіны па нанесенні ўдараў на вялікія адлегласці… Крылатыя ракеты «Фламінга» дазваляюць наносіць удары ўглыб тэрыторыі Расіі з выкарыстаннем баегалоўкаў вялікага калібру», — сказаў старшы навуковы супрацоўнік Міжнароднага інстытута стратэгічных даследаванняў Дуглас Бэры.

Маса ракеты «Фламінга» — 6 тон, унутры адна тона выбухоўкі. Прэс-сакратар Крамля Дзмітрый Пяскоў адмовіўся ад каментароў для Bloomberg. У пачатку вайны ракетныя трывогі ў Расіі галоўным чынам абмяжоўваліся прыгранічнымі рэгіёнамі і акупаванымі тэрыторыямі Украіны. Але сёлета, згодна з аналізам Bloomberg, трывога хоць раз гучала ў рэгіёнах, дзе жыве больш за 70% насельніцтва РФ. Маштаб атак паказвае, як хутка выраслі магчымасці Кіева па нанясенні далёкіх удараў і як Украіна ўзмацняе ціск на Пуціна, каб прымусіць яго пайсці на перамовы. Паводле Бэры, здольнасць паражаць крытычна важную інфраструктуру Расіі «прыводзіць да пашкоджання элементаў расійскай ваеннай прамысловасці, б'е па эканоміцы і дэманструе расійскай грамадскасці, што вайна супраць Украіны мае сваю цану».

Бэры лічыць, што такія ўдары павінны ўзмацняць ціск на Крэмль, але незразумела, ці зробіць гэта Пуціна больш схільным да перамоў. Для Расіі гэта ўжо новая рэальнасць: вайна, якую Крэмль спрабаваў трымаць далей ад насельніцтва, усё часцей прыходзіць углыб краіны.