Эра звышгукавых самалётаў вяртаецца

• 1.07.2026, 17:45

Як змяняцца грамадзянскія пералёты са з'яўленнем новых рэактыўных лайнераў?

У ЗША зноў загаварылі пра вяртанне звышгукавых пасажырскіх пералётаў. Распрацоўка эксперыментальнага самалёта NASA X-59 і перагляд авіяцыйных правілаў могуць адкрыць шлях да новага пакалення лайнераў, здольных значна скараціць час у дарозе, піша Newsweek (пераклад — сайт Charter97.org).

Паводле разлікаў, пералёт з Нью-Ёрка ў Лос-Анджэлес можа скараціцца прыкладна з пяці з паловай да трох гадзін. Маршрут Нью-Ёрк — Лондан можа заняць каля чатырох гадзін замест сямі, а падарожжа з Лос-Анджэлеса ў Сіднэй — стаць амаль на шэсць гадзін карацей.

X-59 ствараецца сумесна NASA і Lockheed Martin. Самалёт не прызначаны для перавозкі пасажыраў — яго задача заключаецца ў выпрабаванні тэхналогій «ціхага» звышгукавога палёту. Замест магутнага гукавога ўдару, які стаў галоўнай праблемай легендарнага Concorde, новы апарат павінен ствараць толькі прыглушаны гукавы імпульс.

Менавіта з-за гучных гукавых удараў у ЗША з 1973 года дзейнічала забарона на грамадзянскія звышгукавыя палёты над сушай. Цяпер Федэральнае авіяцыйнае ўпраўленне прапануе замяніць гэтую забарону нормамі, заснаванымі на дапушчальным узроўні шуму. Такія змены сталі магчымымі дзякуючы развіццю авіяцыйных тэхналогій.

У чэрвені 2026 года X-59 упершыню дасягнуў разліковай хуткасці каля 1,4 ліку Маха і неабходнай вышыні для далейшых выпрабаванняў над населенымі раёнамі. Атрыманыя даныя дапамогуць вызначыць, ці можна дазволіць падобныя палёты ў будучыні.

Хоць камерцыйныя звышгукавыя рэйсы пакуль застаюцца праектам, выпрабаванні X-59 і змяненне правілаў набліжаюць момант, калі далёкія авіяпералёты змогуць займаць амаль удвая менш часу.