Украіна ўжо выпрабоўвае лазерную СПА

• 1.07.2026, 21:24

Ёсць першыя вынікі.

Украіна пераходзіць да новага этапу развіцця супрацьпаветранай абароны. Ужо выпрабоўваюцца лазерныя сістэмы, а дроны-перахопнікі дэманструюць усё вышэйшую эфектыўнасць.

Пра гэта паведаміў міністр абароны Украіны Міхаіл Фёдараў падчас Defense Tech-падзеі Brave1 Advantage, перадае карэспандэнт РБК-Украіна.

Па словах Фёдарава, ва Украіне ўжо тэстуюць лазерныя сістэмы супрацьпаветранай абароны.

«Мы ўжо тэстуем лазер, і ўжо ёсць пэўныя вынікі. Пакуль шмат не камунікуем, але накірунак актыўна рухаецца наперад», — сказаў ён.

Міністр паведаміў, што толькі ў маі ўкраінскія перахопнікі збілі амаль 7 тысяч расійскіх беспілотнікаў тыпу Shahed і «Гербера».

Акрамя таго, падчас адной з апошніх масіраваных атак каля 75% ударных дронаў былі знішчаныя менавіта дронамі-перахопнікамі.

Фёдараў таксама адзначыў, што падчас апошняй атакі на Кіеў украінскім сілам удалося збіць 95% варожых беспілотнікаў. Паводле яго слоў, да канца года Мінабароны плануе дасягнуць такога ж узроўню эфектыўнасці перахопу дронаў па ўсёй тэрыторыі Украіны.

Паводле міністра абароны, ведамства ўжо абвясціла тэндар на закупку яшчэ 150 тысяч беспілотнікаў, частка якіх адносіцца да класа Middle Strike.

Асобным прыярытэтам застаецца стварэнне танных крылатых ракет з выкарыстаннем тэхналогій штучнага інтэлекту.

«Гэта можа гучаць як футурыстычныя праекты, але праз год гэта ўжо не будзе навіной. Мы будзем над гэтым працаваць», — падкрэсліў Фёдараў.

Ён таксама паведаміў, што цяпер ва Украіне тэстуюць распрацоўкі каля дзесяці кампаній, якія ствараюць танныя ракеты для перахопу беспілотнікаў.

Паралельна вядзецца праца над сістэмамі, здольнымі супрацьдзейнічаць балістычным ракетам і кіраваным авіяцыйным бомбам.