Войскі РФ нанеслі ўдары КАБамі па Сумах

• 11.07.2026, 17:01

Загінулі чатыры чалавекі, яшчэ 17 пацярпелі.

Акупанты скінулі тры кіраваныя авіябомбы (КАБ) на грамадзянскую інфраструктуру Зарэчнага раёна горада Сумы, у выніку чаго, паводле апошніх дадзеных, загінулі 4 чалавекі.

Пра гэта паведаміў начальнік Сумскай абласной ваеннай адміністрацыі (ОВА) Алег Грыгораў у Telegram. «На дадзены момант пацверджаная гібель чатырох чалавек у выніку ўдару расійскіх КАБ па Сумах», — паведаміў Грыгораў.

Акрамя таго, яшчэ сямёра пацярпелых былі дастаўленыя ў бальніцы. Медыкі аказваюць ім неабходную дапамогу.

Пазней Грыгораў паведаміў, што колькасць пацярпелых у выніку расійскай атакі павялічылася да 17.

Як удакладніў выконваючы абавязкі мэра Сум Арцём Кобзар, сярод загінулых ёсць 13-гадовая дзяўчынка, якая знаходзілася на прыпынку грамадскага транспарту.

Выратавальная аперацыя працягваецца. У горадзе захоўваецца пагроза варожых атак. Жыхарам Сум раяць знаходзіцца ў бяспечных месцах і не набліжацца да месцаў трапленняў з-за рызыкі паўторных удараў.