ISW: Такога ў Расіі яшчэ не было

• 12.07.2026, 8:53

Дэфіцыт паліва ў 78 з 83 расійскіх рэгіёнах.

У Расіі ў чэрвені прыкметна паскорыўся рост цэн на бензін. Па ацэнцы аналітыкаў амерыканскага Інстытута вывучэння вайны (ISW), адной з прычын стала серыя украінскіх удараў па нафтаперапрацоўчых прадпрыемствах і аб’ектах паліўнай інфраструктуры.

Як адзначаюць у ISW са спасылкай на даныя расійскага агенцтва «Інтэрфакс» і Расстата, у чэрвені сярэдні кошт бензіну вырас на 6,88%. Для параўнання, у маі рост цэн склаў 0,85%, у красавіку — 0,61%, у сакавіку — 1,08%, у лютым — 0,61%, а ў студзені — 1,35%.

Паводле статыстыкі, за чэрвень бензін маркі АІ-92 падаражэў на 7,3%, АІ-95 — на 6,7%, АІ-98 — на 3,1%, а дызельнае паліва — на 7,1%.

У гадавым выражэнні, з чэрвеня 2025 года па чэрвень 2026-га, цэны на бензін павялічыліся амаль на 20%. Для параўнання, за ўвесь 2024 год рост склаў 11,13%, а па выніках 2025 года — 10,78%.

У ISW лічаць, што рэзкае падаражанне паліва звязана з украінскімі ўдарамі па расійскіх нафтаперапрацоўчых заводах, а таксама па аб’ектах захоўвання і лагістыкі, якія забяспечваюць пастаўкі паліва, у тым ліку на акупаваныя тэрыторыі Украіны. На думку аналітыкаў, сітуацыю пагоршыў традыцыйны сезонны рост попыту.

Паводле ацэнкі інстытута, дэфіцыт бензіну ўжо адчуваецца як мінімум у 78 з 83 расійскіх рэгіёнах, а таксама на часова акупаваных тэрыторыях Украіны.

Эксперты ISW мяркуюць, што працяг удараў па аб’ектах паліўнай інфраструктуры можа яшчэ больш ускладніць становішча. На іх думку, існая расійская сістэма супрацьпаветранай абароны пакуль не здольная цалкам прадухіліць падобныя атакі, што можа прывесці да далейшага росту цэн на паліва і стварыць дадатковыя складанасці з забеспячэннем расійскіх войскаў у тыле і ў зоне баявых дзеянняў.