Пад Віцебскам забаранілі святкаваць Купалле

• 12.07.2026, 11:38

Пад пагрозай арышту.

У вёсцы пад Віцебскам жыхарам прыгразілі штрафамі і арыштамі за спробу сабрацца на Купалле. Фота аб’явы апублікавала «Вясна».

Паводле звестак праваабаронцаў, у вёсцы Лятохі Віцебскай вобласці на дошцы аб’яў з’явілася паведамленне пра тое, што святкаванне скасавана з-за забароны міліцыі (аддзел РАУС).

У аб’яве гаворыцца, што за правядзенне мерапрыемства пагражае штраф у 100 базавых велічынь (4500 рублёў) і адміністрацыйны арышт на 15 сутак.

«Любога ўдзельніка могуць арыштаваць. Прыносім свае выбачэнні. P. S. Святкуйце дома», — сказана ў паведамленні.

Як адзначае «Вясна», у гэтай мясцовасці ў многіх ёсць дачы, людзі сябруюць дзесяцігоддзямі і ладзяць сумесныя святы.