У Малдове выбухнуў расійскі дрон

• 13.07.2026, 10:53

Ён заляцеў у краіну пасля атакі на Адэскую вобласць Украіны.

У ноч на 13 ліпеня каля вёскі Копанка Каўшанскага раёна Малдовы ўпаў і выбухнуў расійскі ўдарны дрон «Герань-2». Папярэдне, пацярпелых няма.

Пра гэта паведамляе NewsMaker са спасылкай на заяву праваахоўнікаў.

У паліцыі адзначылі, што каля 01:03 праз службу 112 паступіла паведамленне пра тое, што на ўскраіне вёскі Копанка Каўшанскага раёна людзі выявілі невялікі лятальны апарат, падобны да беспілотніка. Пасля падзення ён выбухнуў, што прывяло да ўзгарання.

«На месца здарэння прыбылі супрацоўнікі паліцыі і пажарныя. Паводле папярэдняй інфармацыі, у выніку інцыдэнту ніхто не пацярпеў. Тэрыторыю ачапілі, а праваахоўнікі праводзяць расследаванне, каб усталяваць усе абставіны таго, што адбылося», — паведамілі ў паліцыі.

У Мінабароны Малдовы заявілі, што на тэрыторыі краіны ўпаў расійскі дрон «Герань-2», які перасёк паветраную прастору Малдовы падчас паветранай атакі на Адэскую вобласць.