Чацвёрты з пачатку ліпеня буйны НПЗ Расіі спыніў працу

• 13.07.2026, 18:38

Сызранскі НПЗ «Раснафты» атакавалі БПЛА.

Сызранскі НПЗ «Раснафты» цалкам спыніў перапрацоўку сыравіны з 12 ліпеня пасля атакі беспілотніка, паведамляе Reuters са спасылкай на дзве крыніцы ў галіне.

Паводле слоў суразмоўцаў агенцтва, пасля налёту БПЛА ў нядзелю на заводзе магутнасцю 8,5 млн тон у год была пашкоджаная ўстаноўка першаснай перапрацоўкі АВТ-5, якая забяспечвала 29% магутнасці НПЗ (7,1 тыс. тон у суткі). Другая, больш магутная ўстаноўка АВТ-6, што давала 71% магутнасці завода, была спыненая яшчэ ў канцы мая, таксама пасля атакі БПЛА.

З панядзелка Сызранскі НПЗ, які ўваходзіць у Самарскую групу «Раснафты», спыніў рэалізацыю нафтапрадуктаў на Санкт-Пецярбургскай таварна-сыравіннай біржы, паведамілі крыніцы Reuters.

Сызранскі НПЗ, які штогод выпускае каля 800 тыс. тон бензіну і 1,5 млн тон дызпаліва, стаў чацвёртым расійскім НПЗ, што спыніў вытворчасць у гэтым месяцы. 8 ліпеня пасля атакі БПЛА спыніўся Саратаўскі НПЗ «Раснафты», 6 ліпеня — Амскі НПЗ, найбуйнейшы ў Расіі і здольны перапрацоўваць 22 млн тон нафты ў год. 2 ліпеня спыніў перапрацоўку НПЗ «Нижегороднефтеоргсинтез» «Лукойла», які займае другое месца ў краіне па выпуску бензіну.

Паводле даных крыніц Reuters, у ліпені выпуск бензіну ў Расіі знізіўся да дзвюх трацін ад унутранага спажывання — 75–80 тыс. тон у суткі пры попыце ў летнія месяцы каля 115–120 тыс. тон. Выпуск дызельнага паліва скараціўся на 40% ад нормы і цяпер прыкладна роўны ўнутранаму спажыванню, аднак лішніх аб'ёмаў для экспарту ў нафтавых кампаній больш няма, ацэньвалі суразмоўцы агенцтва.