Трамп пракаментаваў чуткі пра датычнасць Расіі да смерці сенатара Грэма

• 14.07.2026, 13:55

Прэзідэнт ЗША заявіў, што ў яго паплечніка былі праблемы са здароўем.

Пасля смерці ў мінулую суботу сенатара-рэспубліканца Ліндсі Грэма, вядомага сваёй жорсткай пазіцыяй у дачыненні да Расіі і які называў Уладзіміра Пуціна нелегітымным прэзідэнтам, у публічнай прасторы з’явіліся выказванні пра тое, што да яго смерці могуць мець дачыненне расійскія спецслужбы. Аднак прэзідэнт Дональд Трамп у інтэрв’ю амерыканскім журналістам сказаў, што не з’яўляецца прыхільнікам гэтай ідэі і даў зразумець, што падставаў сумнявацца ў папярэдняй выснове судмедэкспертызы пра разрыў аорты як прычыну смерці Грэма няма.

13 ліпеня вядучы Newsmax Грэг Кэлі спытаў у Трампа, ці ёсць у таго асцярогі або падазрэнні наконт смерці Грэма ў сувязі з тым, што «ў рускіх ёсць звычка травіць тых, хто ім не падабаецца». Прэзідэнт ЗША ў адказ заявіў, што ў сенатара былі «сур’ёзныя» праблемы са здароўем. «Адказваючы на гэтую канспіралагічную тэорыю, я з задавальненнем сказаў бы «так», але думаю, што ў яго былі праблемы [са здароўем]… і яго бацька памёр прыблізна ў тым жа ўзросце. У яго былі праблемы, якія сядзелі даволі глыбока і якія было не так проста выявіць», — сказаў кіраўнік Белага дома. Ён дадаў, што, паводле паведамленняў лекараў, пэўная частка цела Грэма «літаральна выбухнула».

У панядзелак офіс Грэма паведаміў, што, згодна з папярэднім заключэннем судмедэкспертаў, палітык памёр ад разрыву ўнутранай сценкі аорты. Адзначалася, што афіцыйная прычына смерці будзе названа пасля неабходных экспертыз. Сенатар, які быў актыўным прыхільнікам узмацнення ваеннай падтрымкі Украіны і ціску на Маскву, памёр 11 ліпеня ў сваім доме на Капітолійскім пагорку. За дзень да гэтага ён наведваў Кіеў, дзе сустракаўся з прэзідэнтам Уладзімірам Зяленскім.

Пра тое, што Грэма маглі забіць расійскія спецслужбы, казаў, напрыклад, брытанскі фінансіст Біл Браўдэр, піша The Moscow Times.

«Не хачу быць прыхільнікам тэорыі змовы, але <�Ліндсі Грэм быў галоўным ініцыятарам законапраекта аб разбуральных санкцыях супраць Расіі… Ён толькі што вярнуўся з Украіны, дзе, як вядома, дзейнічаюць расійскія агенты. Рускія — эксперты ў выкарыстанні ядаў, [дзеянне] якіх выглядае як сардэчныя прыступы», — пісаў ён у X 12 ліпеня. Таксама Браўдэр заклікаў «неадкладна» правесці ўсе неабходныя экспертызы, бо ён «бачыў дастаткова падазроных смерцяў, звязаных з Расіяй».

Падобныя падазрэнні агучыў сацыёлаг Ігар Эйдман. На яго думку, у Крамлі Грэма лічылі той фігурай, якая змяніла пазіцыю Трампа адносна Расіі. Сацыёлаг дапусціў, што падчас апошняга візіту ва Украіну расійскія спецслужбы маглі атруціць сенатара, напрыклад, з выкарыстаннем атруты запаволенага дзеяння.

Таксама на версіі аб атручванні рэспубліканца Расіяй або Іранам настойвала актывістка руху MAGA і прыхільніца Трампа Лора Лумер, якая патрабавала неадкладнага правядзення таксікалагічнай экспертызы. Першы намеснік старшыні міжнароднага камітэта Дзярждумы Святлана Журава заяўляла, што гэта «піяр-ход» дзеля павышэння папулярнасці перад выбарамі.