Гамяльчане: Няўжо так складана за 20 гадоў хоць раз пачысціць ліўнёўку?

• 14.07.2026, 15:25

Патоп пасля моцных дажджоў у абласным цэнтры — кожны год.

Шмат жыхароў Гомеля абураныя тым, што ўлады знаходзяць грошы на салюты і святы, але не могуць вырашыць элементарныя праблемы. Прычынай абурэння стаў патоп, які паралізаваў рух у цэнтры горада пасля ўчорашняга ліўню.

«Праспект Перамогі, вуліцы Кірава, Савецкая — учора ў цэнтры праехаць было немагчыма ўвогуле, машыны плавалі, — піша чытач сайта Charter97.org. — Прычым, акурат тры дні таму — тое самае было. І так штогод, пасля кожнага нават не вельмі моцнага ліўню. Здаецца, і грошы ёсць — святы, фестывалі, на якія народ прымусова зганяюць, праводзяць пастаянна. Дык няўжо так складана за 20 гадоў хоць раз пачысціць ліўнёўку?»

Многія гамяльчане скардзяцца на наступствы ліўню і ў сацыяльных сетках:

— Гомель. Патлумачце, чаму пасля ліўню такая праблема ўзнікае кожны раз і ніяк не вырашаецца? У чым складанасць або прычына?

— Замена труб — гэта не істотна. Галоўнае — фасад і вонкавы бляск: лямпачак навешаць, петуній насадзіць, помнікі і зоркі... Пытанне задайце хвалёнаму старшыні.

— Уся праблема ў структуры ліўневай каналізацыі нашага горада, а канкрэтна — дыяметра існых труб проста недастаткова, каб такі вялікі паток вады сыходзіў, плюс большасць ліўнёвак патрабуе прачысткі ад смецця, на што камунальныя службы неахвотна рэагуюць. А трубы ніхто не памяняе — гэта каштуе грошай.

— Адсутнасць жадання і сродкаў… Трэба ж рух перакрыць, усё раскопаць, ліўнёвую замяніць, а на гэты час арганізаваць аб'езды, патраціць шмат грошай. Лепш прыдумаць салют і канцэрт на Дзень горада.

— Ліўнёвыя трубы вы калі-небудзь бачылі, як чысцяць спецыяльнай машынай і вадой пад ціскам? Не. Вось і адказ.

— Складанасць і прычына толькі ў адным: у бяздзейнасці тых службаў, што павінны гэтым займацца.

— Ліўнёўкі гадоў 10 забітыя, ніхто іх не чысціць.

— Людзей у службах няма, за капейкі працаваць ніхто не хоча.