Лукашэнка зноў уключыў рэтранслятары?

• 15.07.2026, 14:42

Сёння імі маглі карыстацца расіяне для ўдару па АЗС пад Жытомірам.

Не выключана, што рэтранслятары ў Беларусі, у якіх вельмі зацікаўленыя расіяне для навядзення «Шахедаў», час ад часу выкарыстоўваюцца для атакаў на Украіну. Такое меркаванне выказаў дарадца міністра абароны Украіны Сяргей (Флэш) Бескрэстнаў у сваім Telegram-канале.

Па яго словах, сёння а 7:11 кіраваны рэактыўны «Шахед» атакаваў АЗС у Маліне ў Жытомірскай вобласці. Як адзначае спецыяліст, паводле даных украінскіх радыёлакацыйных станцый, дрон праляцеў уздоўж мяжы з Беларуссю, даляцеў да Каростэня проста над трасай. Затым разгарнуўся і паляцеў проста над чыгункай да Маліна, дзе і атакаваў аўтазаправачную станцыю.

«Такія паводзіны характэрныя для ручнога кіравання БПЛА па камеры. Адлегласць ад пункта атакі да мяжы РФ складае 260 кіламетраў. Гэта задалёка для працы прамога радыёканала. Іншых «Шахедаў» (магчымых рэтранслятараў) у гэты час у паветры не было. Канчатковыя высновы зробяць профільныя службы і падраздзяленні пасля дэтальнага вывучэння сітуацыі», — адзначыў Флэш.

Ён дадае, што праціўніку вельмі трэба і важна атакаваць заходнюю частку Украіны «Шахедамі» з анлайн-кіраваннем, але без рэтранслятараў на тэрыторыі Беларусі яны гэтага зрабіць не могуць.

Нагадаем, Уладзімір Зяленскі у пятніцу, 19 чэрвеня, патрабаваў ад рэжыму Лукашэнкі на працягу тыдня прыбраць рэтранслятары дронаў, якія знаходзяцца ў прыгранічных раёнах Беларусі і якія Расія выкарыстоўвае для каардынацыі атак па ўкраінскай тэрыторыі.

«Ён можа гэта зняць? Думаю, яму будзе дастаткова тыдня, каб гэта зрабіць. Калі ён гэтага не зробіць, гэта зробім мы», — заявіў ён.

24 чэрвеня Зяленскі заявіў, што рэтранслятары спынілі працу. Паводле яго слоў, пакуль невядома, ці былі гэтыя сістэмы дэмантаваныя.

29 чэрвеня галоўнакамандуючы Узброенымі сіламі Украіны Аляксандр Сырскі заявіў, што рэтранслятары на тэрыторыі Беларусі яшчэ не прыбралі. Паводле яго слоў, 29 чэрвеня адзін з іх часова ўключалі.