Агенцтва па міграцыі Узбекістана ўступілася за сваіх суайчыннікаў у Беларусі

• 15.07.2026, 18:02

У ведамстве нагадалі пра абяцанне рэжыму Лукашэнкі плаціць працаўнікам з Узбекістана ад $900 да $1200.

У сацыяльных сетках распаўсюдзіліся відэаролікі, у якіх жыхары Андыжанскай вобласці, якія адправіліся на сезонныя працы ў Беларусь, паскардзіліся на памер зарабнай платы.

Сітуацыю пракаментавала Агенцтва па міграцыі Узбекістана.

Паводле дадзеных ведамства, у Беларусь для працы ў сферы сельскай гаспадаркі і жывёлагадоўлі былі накіраваныя больш за 250 жыхароў Андыжанскай вобласці.

У відэазваротах некаторыя працоўныя мігранты паведамілі, што наймальнікі прапанавалі ім штомесячны заробак у памеры 500 долараў ЗША. Па іх словах, пасля ўтрымання выдаткаў на пражыванне і паўсядзённыя патрэбы астатняя сума не адпавядае чаканаму даходу. У сувязі з гэтым некаторыя з іх выказалі жаданне вярнуцца ў Узбекістан.

Як паведаміла кіраўніца прэс-службы Агенцтва па міграцыі Гулрух Тулаева, прадстаўнікі агенцтва ў Беларусі сумесна з адказнымі супрацоўнікамі хакіміята Андыжанскай вобласці вывучаюць сітуацыю на месцы.

Па яе словах, калі будзе ўстаноўлена, што наймальнік не выконвае ўмовы працоўнага дагавора або не выплачвае ўзгодненую зарабную плату, грамадзянам прапануюць іншыя працоўныя месцы. Зараз прымаюцца меры для ўрэгулявання сітуацыі.

У ведамстве ўдакладнілі, што праект рэалізуецца ў межах пагаднення паміж хакімиятам Андыжанскай вобласці, Агенцтвам па міграцыі і Камітэтам па працы, занятасці і сацыяльнай абароне Віцебскай вобласці Беларусі.

Згодна з умовамі праекта, сярэднемесячная зарабная плата павінна складаць 900–1000 долараў ЗША, а ў асобных выпадках — да 1200 долараў ЗША.

Нагадаем, 8–9 ліпеня падчас дзяржаўнага візіту прэзідэнта Узбекістана Шаўката Мірзіёева у Беларусь было падпісана міжурадавае пагадненне аб арганізаваным прыцягненні грамадзян да часовай працоўнай дзейнасці.