BI: У Украіны ўжо ёсць дроны-«маткі» для запуску перахопнікаў з вады, сушы і паветра

• 15.07.2026, 23:27

Такі падыход дазваляе Украіне наносіць удары або абараняцца з большай адлегласці.

Дроны-перахопнікі і FPV-дроны ўкраінскай арміі становяцца больш функцыянальнымі і небяспечнымі для праціўніка, паколькі Украіна ўсё шырэй ужывае тэхналогію іх запуску з носьбітаў. Беспілотнікі самалётнага тыпу, пілотаваныя самалёты, наземныя і марскія дроны становяцца платформамі для запуску невялікіх БПЛА, піша Business Insider.

Аўтары адзначылі, што марскія дроны ўсё часцей нясуць дадатковыя апараты і падчас атак на расійскія аб’екты, і пры адбіцці паветраных нападаў РФ, становячыся своеасаблівым новым відам прыбярэжнай супрацьпаветранай абароны.

«Такі падыход дазваляе Украіне наносіць удары або абараняцца з большай адлегласці, з менш прадказальных напрамкаў і з выкарыстаннем больш танных сістэм, чым традыцыйнае ўзбраенне», — патлумачылі ў артыкуле.

Дадатковыя платформы-носьбіты вырашаюць адну з галоўных праблем выкарыстання FPV-дронаў — дастаўляюць іх на вялікія адлегласці без страты зараду акумулятара. Таксама дапамагаюць пераадольваць перашкоды і дазваляюць забяспечыць бяспеку аператараў. Гэта таксама надае элемент нечаканасці, бо дазваляе дастаўляць дроны на аператыўную глыбіню.

Пры гэтым у марскім асяроддзі на гэты момант носьбіты выкарыстоўваюцца часцей за ўсё. У красавіку ўпершыню зафіксавалі знішчэнне расійскага «Шахеда» перахопнікам, запушчаным з мора. Аўтары прывялі словы прадстаўніка кампаніі Wild Hornets, які лічыць, што «марскія беспілотнікі з’яўляюцца практычнай платформай для запуску Sting, бо яны могуць дапамагчы абараніць гарады ўздоўж Чорнага мора».

А прадстаўнік ГУР Мінабароны расказаў, як падчас адной атакі супрацоўнікі расійскай берагавой аховы спрабавалі спыніць групу марскіх дронаў з дапамогай стралковай зброі. Але з платформы былі запушчаныя FPV-дроны, якія акружылі расійскіх вайскоўцаў і ліквідавалі некалькіх з іх.