Украіна атакавала расійскую авіябазу Энгельс са стратэгічнымі бамбавікамі

• 16.07.2026, 7:37

Украінскія дроны праляцелі больш за 1000 км.

У ноч на 16 ліпеня ЗСУ нанеслі авіяўдар па вайсковай авіябазе Энгельс у Саратаўскай вобласці Расіі, дзе базуюцца стратэгічныя бамбавікі Ту-95МС, якія абстрэльваюць ракетамі Украіну. Пра гэта піша «Дыялог» пасля маніторынгу сацсетак.

Паветраную трывогу ў рэгіёнах Саратаўскай вобласці пачалі абвяшчаць пасля паўночы. Неўзабаве пасля гэтага жыхары горада Энгельс пачулі некалькі выбухаў. Сцвярджаецца, што дроны атакавалі вайсковую авіябазу. Відэа публікуе Telegram-канал Exilenova+ (асцярожна, ненарматыўная лексіка!).

Губернатар Саратаўскай вобласці Раман Бусаргін прызнаў, што ўначы 16 ліпеня ў рэгіёне адбівалі атаку БПЛА. Ён заявіў, што ў горадзе Энгельс пашкоджаная інфраструктура, але ніякіх дэталяў не прывёў. Паводле яго слоў, на месцы здарэння працуюць усе аператыўныя службы.

На авіябазе Энгельс у Саратаўскай вобласці базуюцца стратэгічныя бамбавікі Ту-95МС, якія актыўна выкарыстоўваюцца ў вайне супраць Украіны, таму яна з'яўляецца законнай мэтай для ЗСУ. Такія ракетаносцы ўзброеныя крылатымі ракетамі вялікай далёкасці – «Х-101» і «Х-55» / «Х-555». Іх колькасць залежыць ад мадыфікацыі самалёта.