А хто заступіцца за беларусаў?
- 16.07.2026, 13:41
Некалькі высноваў з бунту рабочых з Узбекістана.
Прыехаўшыя ў Беларусь некалькі дзён таму рабочыя з Узбекістана, падаецца, атрымаюць нармальныя ўмовы працы і надбаўку да зарплаты. Пры гэтым сітуацыя вакол іх развіваецца імкліва, піша planbmedia.io.
Мы так не дамаўляліся
Пра першы чартар з грамадзянамі Узбекістана, што прыляцелі працаваць у Віцебскую вобласць, Агенцтва па міграцыі паведаміла 13 ліпеня. 15 ліпеня работнікі запісалі відэа пра тое, што іх не задавальняе нізкая зарплата (500 долараў, жыллё і харчаванне за свой кошт). Маўляў, столькі яны і дома зарабляюць. Абяцалі — па 1000 долараў.
Беларускія прапагандысты спрабавалі звыклай атакай паставіць незадаволеных на месца. «Прапанаванні аб наяўных у наймальнікаў вакансіях, умовах працы і пражывання, заработнай плаце (чыстымі і «бруднымі») і г.д., вядома ж, былі накіраваныя загадзя, — заявіў Грыгорый Азаронак. — Аплата, паўтаруся, таксама абмяркоўвалася загадзя. Прапаноўвалася на рукі не менш за 500 долараў, гэта ўжо пасля ўсіх утрыманняў. Зразумела, што зарабіць можна больш, усё залежыць ад самога чалавека, які працуе».
Але за ўзбекістанцаў, падаецца, ёсць каму заступіцца. У той жа дзень СМІ Узбекістана апублікавалі каментар Агенцтва па знешняй міграцыі. Прэс-сакратар Агенцтва па міграцыі Гулрух Тулаева заявіла, што прадстаўнікі агенцтва і хакіміята Андыжанскай вобласці ўжо працуюць на месцы сумесна з наймальнікамі для ўрэгулявання сітуацыі, напісаў партал daryo.uz.
У агенцтве падкрэслілі, што калі наймальнік адмовіцца выплачваць заробак, прадугледжаны працоўнай дамовай, або парушыць іншыя ўмовы, работнікаў перавядуць да іншага наймальніка. Пры гэтым пытанне абяцалі вырашыць да канца дня.
Паводле дадзеных агенцтва, у працоўных дамовах прадугледжаны сярэдні штомесячны заробак у памеры 900–1000 долараў, а максімальны — 1200 долараў.
У выніку ўжо ўвечары рабочыя запісалі новае відэа, расказалі, што пытанні ўрэгуляваныя. А Азаронак заявіў, што першае відэа з месца пражывання ўзбекскіх рабочых — гэта часовае месца, дзе частка людзей начавала ўсяго адну ноч. Цяпер жа яны жывуць у іншым месцы, дзе «ўсё чыста, прыгожа, дагледжана».
Інвестыцыі і 5000 работнікаў
Не застаўся ўбаку і прэзідэнт Узбекістана Шаўкат Мірзіёеў. 15 ліпеня ён «азнаёміўся з прэзентацыяй па рэалізацыі дамоўленасцяў аб пашырэнні міжрэгіянальнага супрацоўніцтва, дасягнутых падчас візіту ў Беларусь».
А дамоўленасці сур'ёзныя: ідзе гаворка пра рэалізацыю 310 сумесных праектаў і мерапрыемстваў агульным коштам 2 млрд долараў у сферах машынабудавання, сельскай гаспадаркі, фармацэўтыкі, тэкстыльнай прамысловасці, перапрацоўкі драўніны і аховы здароўя. У першым пакеце — 30 праектаў на суму больш за 100 млн долараў.
Усяго на першым этапе плануюць на конкурснай аснове працаўладкаваць 1 100 грамадзян Узбекістана на 13 прадпрыемствах Віцебскай і іншых абласцей. Ужо з верасня хочуць штомесяц працаўладкоўваць у Віцебскай вобласці 500 жыхароў Андыжанскай вобласці. Усяго — 5 тысяч. Для гэтага ў Віцебску адкрыюць прадстаўніцтва Агенцтва міграцыі.
Без крыўдаў
Першыя ж дні знаходжання работнікаў з Узбекістана паказваюць: крыўдзіць іх не варта. Цярпець ні дрэнныя ўмовы, ні нізкі заробак яны не будуць. Пра свае праблемы гаварыць не саромеюцца. А заткнуць і запалохаць людзей прапагандыстамі не атрымаецца. Ім ёсць каму паскардзіцца, за іх ёсць каму заступіцца.
А вось інфармацыя пра тое, наколькі гасцінная Беларусь да працоўных мігрантаў, разыходзіцца па сетцы. Разам з сентэнцыямі Азаронака і К пра тое, якой павінна быць працоўная міграцыя. «Па прыездзе людзі не фармуюць ніякіх дыяспар, не збіваюцца ні ў якія кланы. Яны заключаюць кантракт з прадпрыемствам, а затым разам з сем'ямі засяляюцца ў інтэрнат, дзе ўсе ў ўсіх на віду. І іх рэгулярна наведвае мясцовы ўчастковы, каб нават думак не ўзнікала парушаць звыклы для беларусаў парадак. Я нагадаю, калі хто забыўся. У нас — «дыктатура». У нас — наймацнейшыя сілавыя структуры. Мыш не прабяжыць без спецдазволу», — строга вяшчае галоўны прапагандыст краіны.
Дарэчы, сярэдні заробак у Віцебскай вобласці цяпер — 880 долараў. Узбекістан, падаецца, выб'е для сваіх пабольш. А вось за беларусаў крыўдна — заступіцца за іх няма каму, за заробак пахлопатаць таксама.
Застаецца цярпець або з'язджаць. А на палях Віцебскай вобласці могуць папрацаваць прапагандысты. Вельмі ўжо складна яны распавядаюць, як, каму і за колькі трэба працаваць.