Google паказаў самыя сакрэтныя будоўлі Гомельшчыны

• 16.07.2026, 17:31

Афіцыйнай інфармацыі пра іх амаль няма.

Фотаздымкі самых сакрэтных будоўляў у Гомельскай вобласці з’явіліся падчас апошніх абнаўленняў сэрвісу спадарожнікавых здымкаў Google. Новы здымак можна датаваць канцом сакавіка 2026 года — на мясцовасці яшчэ бачны снег. На фота адлюстраваная частка Рэчыцкага і Гомельскага раёнаў Гомельскай вобласці. «Флагшток» распавядае, што стала відаць.

Найбольш цікавыя стратэгічныя будоўлі, пра якія афіцыйнай інфармацыі практычна няма: вайсковы гарадок з тактычным полем (патрапіў на здымак цалкам) і вайсковы палігон (патрапіў часткова).

Гэта буйнейшыя будаўнічыя аб’екты Гомельскай вобласці — габарыты вайсковага гарадка набліжаюцца да параметраў мікрараёна Шведская Горка, з той агаворкай, што вайсковы гарадок мае меншы будаўнічы аб’ём з-за розніцы паміж будаўніцтвам буйнапанэльнага жылля і ваеннай інфраструктуры. Узвядзенне гэтых ваенных аб’ектаў адначасова з рэалізацыяй праектаў дамбаў і інфраструктурных праектаў прывяло ў Гомелі да дэфіцыту будаўнічага пяску.

На будаўнічай пляцоўцы бачна мноства будаўнічых вагончыкаў, відаць дзясяткі адзінак тэхнікі: бетонамяшалкі, краны, самазвалы, асабісты транспарт будаўнікоў.

На здымак таксама патрапіла паўночная частка вайсковага палігона ў Рэчыцкім раёне. Верагодна, гэта фармаваная насып для чыгуначнай веткі да палігона.

Будаўніцтва вайсковага гарадка і палігона вядзе ААТ «Гомельскі дамабудаўнічы камбінат» (генпадрадчык) і субпадрадныя арганізацыі.

Згодна з інвестыцыйнай праграмай, на бліжэйшыя тры гады ў рамках фінансавання будаўніцтва палігона ў Рэчыцкім раёне прадугледжана выдзяленне з бюджэту 410 млн рублёў (каля 141 млн долараў).

Меркаваны аб’ём фінансавання вайсковага гарадка, паводле звестак з інвестпраграмы, дасягнуў 390,59 млн рублёў (каля 120,2 млн долараў).