ChatGPT даказаў 50-гадовую гіпотэзу з тэорыі графаў
- 17.07.2026, 0:59
Рашэнне было знойдзена адначасова з запускам новай версіі мадэлі.
Мадэль ШІ GPT-5.6 Sol кампаніі OpenAI змагла атрымаць доказ гіпотэзы пра падвойнае пакрыццё цыкламі (Cycle Double Cover Conjecture), якая заставалася адкрытай матэматычнай праблемай больш за пяць дзесяцігоддзяў. Пра гэта паведамляе часопіс Scientific American.
Паводле кампаніі, рашэнне было знойдзена адначасова з запускам новай версіі мадэлі. Гіпотэза адносіцца да тэорыі графаў — раздзела матэматыкі, які вывучае аб'екты, што складаюцца з вяршыняў і рэбраў, якія злучаюць іх.
Гіпотэза была сфармулявана ў 1970-х гадах і сцвярджала, што пэўны клас графаў можна пакрыць наборам цыклаў так, каб кожнае рэбро ўваходзіла роўна ў два замкнёныя контуры. Да гэтага часу матэматыкі маглі пацвердзіць гэтую ідэю толькі для асобных тыпаў графаў, аднак агульнага доказу атрымаць не ўдавалася.
Паводле OpenAI, GPT-5.6 Sol распрацавала доказ, які паказвае, што любы граф, які адпавядае ўмовам гіпотэзы, можна пакрыць максімум васьмю спецыяльна падабранымі цыкламі.
Матэматык Нога Алон з Прынстанскага ўніверсітэта адзначыў, што падобныя вынікі дэманструюць узрастаючую ролю інструментаў штучнага інтэлекту ў навуковых даследаваннях. Паводле яго слоў, ШІ паступова становіцца памочнікам у вырашэнні задач, якія раней патрабавалі значных намаганняў ад спецыялістаў.
Для пошуку рашэння OpenAI выкарыстала спецыяльны сцэнар узаемадзеяння з мадэллю. У межах эксперыменту задача была размеркавана паміж 64 ШІ-агентамі, якія працавалі паралельна. Распрацоўнікі таксама далі мадэлі ўказанне працягваць пошук нават у выпадку, калі праблема лічылася невырашальнай, і рэкамендавалі выдзеліць на даследаванне не менш чым восем гадзін.
Прафесар Масачусецкага тэхналагічнага інстытута Эндру Сазерленд выказаў меркаванне, што падобныя адкрыцці могуць стаць больш частымі. На яго думку, многія матэматычныя задачы атрымліваюць статус «надзвычай складаных» з-за недахопу ўвагі даследчыкаў, у той час як вялікія моўныя мадэлі здольныя аб’ядноўваць ужо існыя метады і знаходзіць новыя падыходы да даўно вывучаных праблем.