«Пакуль пакупнік не даехаў да ДАІ»

• 18.07.2026, 8:40

Пасля продажу аўто беларусаў можа чакаць «сюрпрыз» ад падатковай.

У Мінфіне распавялі пра нюансы па сплаце транспартнага падатку. Адна з сітуацый датычыць унясення гэтага збору за прададзены аўтамабіль.

«Здавалася б, звычайная сітуацыя: вы падпісалі дагавор куплі-продажу аўтамабіля, атрымалі грошы і паціснулі руку пакупніку. Але праз некаторы час атрымліваеце паведамленне аб сплаце транспартнага падатку за ўжо „чужы“ аўтамабіль», — прывялі прыклад у Мінфіне і растлумачылі, чаму падатак налічваецца на машыны, якія аўтамабілісту ўжо не належаць.

У Мінфіне ўдакладнілі, што самога факта падпісання дагавора аб продажы аўтамабіля і перадачы ключоў пакупніку недастаткова, каб «для дзяржавы чалавек перастаў быць уласнікам аўтамабіля».

«Пры здзелках паміж звычайнымі грамадзянамі права ўласнасці ў пакупніка ўзнікае, а ў прадаўца спыняецца толькі з моманту дзяржаўнай рэгістрацыі дагавора ў ДАІ альбо з моманту яго натарыяльнага засведчання, — дадалі ў Мінфіне. — Пакуль пакупнік не даехаў да ДАІ і не зарэгістраваў ваш дагавор, вы юрыдычна застаецеся ўладальнікам аўтамабіля».

У ведамстве ўдакладнілі, што «Падатковы кодэкс у гэтым пытанні непахісны, транспартны падатак разлічваецца выключна па базе даных ДАІ: няма зняцця аўтамабіля з уліку — падатак працягвае налічвацца вам».