Затрыманыя ў Польшчы агенты КДБ здымалі акцыі беларусаў у Варшаве

• 2.07.2026, 12:21

Адзін з іх арыштаваны на тры месяцы.

Супрацоўнікі Агенцтва ўнутранай бяспекі Польшчы затрымалі 19-гадовага беларуса і 44-гадовага паляка, якія дзейнічалі ад імя замежных службаў, паведаміў у сацыяльнай сетцы X прэс-сакратар міністра-каардынатара спецыяльных службаў Яцэк Дабжыньскі.

«Людзі, аплачваныя беларускай выведкай, бралі ўдзел у мерапрыемствах, арганізаваных у Варшаве беларускай меншасцю, дзе яны запісвалі і фатаграфавалі ўдзельнікаў», — напісаў Дабжыньскі. Дзейнасць падазраваных каардынавалася праз Telegram. Аплату яны атрымлівалі ў крыптавалюце.

Ён дадаў, што «сабраныя матэрыялы, перапраўленыя праз усходнюю мяжу, выкарыстоўваліся службамі Лукашэнкі і прапагандай рэжыму».

Грамадзянін Беларусі ўзяты пад варту на тры месяцы. У яго канфіскаваны пашпарт, яму забаронены выезд з краіны, і ён знаходзіцца пад наглядам паліцыі, перадае (TVP Info https://www.tvp.info/94136209/polak-i-bialorusin-dzialali-na-zlecenie-bialoruskiego-wywiadu-kolejne-zatrzymania-w-sprawie).

«Гэта чарговыя затрыманні ў межах расследавання, якое праводзіцца Жэшувскім аддзяленнем Агенцтва ўнутранай бяспекі і Люблінскім аддзяленнем пракуратуры», — напісаў Дабжыньскі. Ён нагадаў, што ў межах расследавання ўжо былі затрыманыя пяць чалавек, у тым ліку трое грамадзян Беларусі і двое — Украіны.

Трое падазраваных знаходзяцца пад вартай з лістапада 2025 года, адзін змешчаны ў цэнтр утрымання непаўналетніх.