Адна з найбуйнейшых сетак лабараторый Беларусі зменіць назву

• 2.07.2026, 13:13

Рэбрэндынг абумоўлены змяненнем структуры ўласнасці.

Сетка медыцынскіх лабараторый Synlab абвясціла пра змену назвы. У найбліжэйшы час кампанія пачне працаваць пад брэндам MonoLab, піша Onliner.

Як паведамілі ў кампаніі, рэбрэндынг абумоўлены змяненнем структуры ўласнасці. Беларускае падраздзяленне больш не ўваходзіць у склад міжнароднай групы Synlab International і працягне працу як самастойная медыцынская лабараторыя.

У кампаніі падкрэсліваюць, што для пацыентаў змена брэнда не пацягне сур'ёзных змен. Паступова будуць абноўлены шыльды, фірменны стыль, інфармацыйныя матэрыялы і кліенцкія сэрвісы, аднак прынцыпы працы застануцца ранейшымі.

У планах MonoLab — пашырэнне сеткі, павелічэнне колькасці даступных даследаванняў, развіццё новых напрамкаў лабараторнай дыягностыкі і ўкараненне дадатковых сэрвісаў для пацыентаў і партнёраў.

Нагадаем: лабараторыя пачала працу ў Беларусі ў 2002 годзе. У 2006 годзе яна ўвайшла ў склад нямецкай групы Synlab International, а цяпер працягне дзейнасць ужо як незалежны беларускі брэнд.