Гэтая паездка можа змяніць настроі ў ЗША

• Астап Ярыш
• 21.07.2026, 13:12

Ва Украіну прыехала блізкая саюзніца Трампа.

На тле ўсіх бурлівых падзей ва Украіну прыбыла Лора Лумер — адна з самых уплывовых блогерак і актывістак у свеце MAGA. Я ўжо пісаў пра яе і яе погляды, таму не буду паўтарацца. Нагадаю толькі, што аўдыторыя Лумер перавышае два мільёны чалавек, да яе прыслухоўваецца Дональд Трамп, а сама блогерка аказвала прамы ўплыў на некаторыя ключавыя рашэнні, што прымаліся ў Авальным кабінеце.

Дык вось, яшчэ да нядаўняга часу Лора Лумер, як і многія ультракансерватыўныя амерыканскія блогеры, распаўсюджвала антыўкраінскую рыторыку. У лютым 2024-га яна пісала: «Мне сапраўды не падабаецца Украіна. Я там ніколі не была. Але мне не прыходзіць у галаву нічога добрага, калі я думаю пра Украіну. Затое ў мяне няма ані найменшага негатыўнага пачуцця ў дачыненні да Расіі». Акрамя таго, яна сцвярджала, што ва Украіне поўна нацыстаў, выступала супраць прадастаўлення дапамогі і ўсё ў такім духу.

Нядаўна Лумер заявіла, што стала ахвярай расійскай прапаганды.

Нядаўна Лумер заявіла, што стала ахвярай расійскай прапаганды і што адныне яна — «афіцыйна за Украіну». Сёння яе рыторыка сапраўды кардынальна адрозніваецца. «Я толькі што прыбыла ва Украіну. Даехаць сюды было неверагодна складана з-за расійскіх тэрарыстаў, якія закрылі паветраную прастору, — напісала Лумер па прыбыцці ў Кіеў. — Я хачу ўбачыць Украіну ўласнымі вачыма. Я паспрабую знайсці пацвярджэнне той прапаганды, якой мяне пічкалі. І калі я гэтага не адшукаю, то раскажу пра гэта ўсім, каб і яны змаглі прыехаць сюды і ўбачыць праўду».

Для многіх навіна пра прыезд Лумер стала нечаканасцю, аднак яе візіт рыхтаваўся ўжо пэўны час — цікавасць асабліва ўзрасла пасля таго, як мінулага месяца Адэсу і Кіеў наведаў яе напарнік. Па выніках паездкі Лора Лумер плануе падрыхтаваць спецыяльны выпуск падкаста. Мне вядома пра некалькі вельмі цікавых сустрэч, запланаваных у яе і яе каманды, таму спадзяюся, што амерыканскіх прыхільнікаў руху MAGA чакае сапраўды якасны кантэнт. Але падкаст — гэта толькі частка справы.

Ужо ў першы дзень паездкі Лумер апублікавала серыю пастоў, якія ў суме набралі больш за паўтара мільёна праглядаў у Твітэры. У іх яна піша пра тое, як Расія разам з Кітаем умешваецца ў амерыканскія выбары; пра тое, як Расія забівае прадстаўнікоў рэлігійных меншасцей, якія не належаць да РПЦ; як Расія выкрала тысячы ўкраінскіх дзяцей; як Расія дапамагае Ірану забіваць грамадзян ЗША і падтрымлівае рэжым, які жадае смерці Дональду Трампу. Адным словам, пра тэмы, што знаходзяць асаблівы водгук у кансерватыўнай аўдыторыі.

У амерыканскіх СМІ пра гэта інфармацыі больш чым дастаткова, аднак на пляцоўках блогераў, што падтрымліваюць рух MAGA, яе бракавала. Падаецца, Лора Лумер поўная рашучасці гэта змяніць. «Я з нецярпеннем чакаю магчымасці паказаць мільёнам прыхільнікаў Трампа і ўсім амерыканцам, наколькі жорсткая Расія, — напісала блогерка. — І растлумачыць, чаму ЗША могуць стаць наступнай мішэнню, калі мы не апамятаемся».

Што ж, мы таксама з нецярпеннем чакаем.

Астап Ярыш, «Фэйсбук»