У Башкартастане атакаваны важны нафтавы аб’ект

• 23.07.2026, 10:17

Слуп дыму бачны здалёк.

Раніцай 23 ліпеня ў Рэспубліцы Башкартастан прагрымеў шэраг магутных выбухаў на тэрыторыі важнага нафтавага аб’екта. Удар прыйшоўся на лінейную вытворча-дыспетчарскую станцыю «Субханкулово».

На месцы атакі ўзнік маштабны пажар. Пра гэта піша маніторынгавы Telegram-канал Supernova.

Паводле інфармацыі відавочцаў, беспілотнікі атакавалі лінейна-вытворча-дыспетчарскую станцыю ў Туймазінскім раёне Рэспублікі Башкартастан. На тэрыторыі аб’екта пасля прыляту БПЛА ўспыхнуў пажар.

Паводле папярэдніх звестак і кадраў з месца падзей, загарэўся адзін з рэзервуараў з палівам, а над станцыяй падняўся густы слуп чорнага дыму. Атака стала часткай серыі ўдараў дронаў па аб’ектах расійскай паліўна-энергетычнай інфраструктуры ў некалькіх рэгіёнах. Паралельна пад удар трапілі нафтабаза і НПЗ «НС-Ойл» у Ульянаўскай вобласці.