На Палессі знайшлі грыб, які не сустракалі больш за 60 гадоў

• 23.07.2026, 13:55

Гэты лясны жыхар расце выключна на дубах.

Лясы Гомельскай вобласці паднеслі вучоным сапраўдны сюрпрыз: там выявілі рэдкі грыб, які нікому не трапляўся на вочы ўжо больш за 60 гадоў. Пра гэта паведамляе Інстытут эксперыментальнай батанікі НАН Беларусі.

Незвычайную знаходку зрабілі падчас даследавання разнастайнасці грыбоў у дубровах Жыткавіцкага раёна. На тэрыторыі Найдзянскага лясагаспадарчага ўчастка і Перароўскага лясніцтва нацпарку «Прыпяцкі» спецыялісты выявілі трутавік дубовы (Fomitopsis pulvina) — від, які апошні раз фіксавалі яшчэ ў 1963 годзе.

Трутавік дубовы — прадстаўнік ксілатрофных грыбоў, гэта значыць тых, што развіваюцца на драўніне. Аднак, у адрозненне ад большасці сваякоў, гэты від селіцца выключна на дубах — жывых або ўжо паваленых, — таму трапляецца надзвычай рэдка.

Пазнаць трутавік дубовы можна па яго яскравай афарбоўцы: маладыя асобнікі маюць насычаны лімонна-жоўты колер, знізу яны белыя або крэмавыя, а мякаць часам аддае ружовым або нават пурпурным адценнем. З узростам грыб цямнее, набываючы жоўта-цагляны тон.