Улюбёны «ваенкар» Пуціна прызнаўся ў скупцы акцый амерыканскіх кампаній падчас вайны

• 23.07.2026, 19:11

Цяпер ён ідзе ў Дзярждуму.

Расійскі прапагандыст і ваенкар ВГТРК Яўген Паддубны, які вылучаны партыяй «Адзіная Расія» на маючыя адбыцца «выбары» ў Дзярждуму, валодае акцыямі буйных заходніх краін, у тым ліку краін — чальцоў НАТА. Пра гэта паведамляе «Коммерсант» са спасылкай на апублікаваныя Цэнтрвыбаркамам (ЦВК) дэкларацыі кандыдатаў. У справаздачнасці Паддубнага, які лічыцца адным з набліжаных да прэзідэнта Уладзіміра Пуціна журналістаў, пазначаныя восем акцый Nebius Group N.V (Нідэрланды), чатыры — Apple (ЗША), столькі ж The Procter & Gamble (ЗША) і адна — Intel Corporation (ЗША), а таксама паі ў ірландскіх фондах FinEx USA Information Technology UCITS ETF і FinEx Physically BackedFunds ICAV.

У 2018 і 2024 гадах Паддубны быў даверанай асобай Пуціна на прэзідэнцкіх выбарах. У верасні 2024-га кіраўнік дзяржавы прысвоіў яму званне Героя Расіі з фармулёўкай «за мужнасць і гераізм, праяўленыя пры выкананні службовага абавязку», пасля атрыманага пры атацы ўкраінскага дрона ў Курскай вобласці ранення. У 2022 годзе Паддубны таксама стаў членам працоўнай групы пры прэзідэнце па мабілізацыі і падтрымцы ўдзельнікаў вайны ва Украіне. За гэта, а таксама за дзейнасць Паддубнага ў якасці ваенкара ВГТРК, «распаўсюджванне дэзінфармацыі і пракрамлёўскай прапаганды» ЕС увёў супраць прапагандыста санкцыі. Таксама ён знаходзіцца ў «чорных спісах» Вялікабрытаніі, Канады і Аўстраліі.

Як вынікае з дзеючых выбарчых нормаў, кандыдат не можа валодаць замежнымі актывамі ў момант рэгістрацыі, калі для гэтага няма прычын, не залежных ад яго. Калі ж удзельнік выбараў не можа пазбавіцца ад такіх актываў, ён абавязаны загадзя папярэдзіць пра гэта ЦВК і падаць доказы, што прыняў усе неабходныя меры для выканання патрабаванняў.

У прэс-службе «Адзінай Расіі» заявілі, што да моманту рэгістрацыі Паддубны «рэалізаваў усе дзеянні па адчужэнні замежных фінансавых дакументаў» і падаў камісіі належныя дакументы.