Найдаражэйшы амерыканскі аўтамабіль усіх часоў ацанілі ў $25 мільёнаў

• 26.07.2026, 11:58

Легендарны спарткар ствараўся, каб кінуць выклік непераможным Ferrari 250 GTO.

На аўкцыён выставілі купэ Shelby Cobra Daytona 1964 года. Легендарны спарткар — найдаражэйшы аўтамабіль ЗША ў гісторыі.

Прыблізны кошт Shelby Cobra Daytona — не менш за 25 мільёнаў долараў. У спарткара ёсць усе шанцы пабіць рэкорд Duesenberg SSJ, які на гэты момант з'яўляецца самым дарагім амерыканскім аўтамабілем ($22 мільёны). Пра знакамітую мадэль паведамілі на сайце аўкцыёну Gooding Christie’s.

Daytona — рэдкая гоначная версія легендарнай Shelby Cobra з абцякальным кузаўком тыпу купэ. Кэрал Шэлбі стварыў яе спецыяльна для таго, каб кінуць выклік у гонках непераможным Ferrari 250 GTO.

Усяго выпусцілі шэсць купэ Shelby Cobra Daytona. Іх аснасцілі 4,7-літровым рухавіком V8 ад Ford Mustang з павялічанай да 385 к.с. магутнасцю. З 4-ступеньчатай механічнай каробкай перадач гэты лёгкі (1043 кг) спарткар здольны разганяцца да 100 км/г за 4 с і развіваць 318 км/г.

Канкрэтна гэта аўто з нумарам кузава CSX2300 — трэцяе ў серыі. У сезоне 1965 года яно стала другім у класе на Гран-пры Францыі ў Рэімсе і трэцім — на гонках у Себрынгу, Дайтоне і на Нюрбургрынгу. Гэта дапамагло Shelby і Ford перамагчы Ferrari і выйграць чэмпіянат свету ў класе GT.

Пасля гэтага Shelby Cobra Daytona ўдзельнічаў у чэмпіянаце Японіі, дзе ў 1966 годзе выйграў дзве гонкі. Сваю кар'еру ў аўтаспорце ён завяршыў у 1968 годзе.

З 1975 па 1998 год гэты спарткар захоўваўся ў калекцыі Кэрала Шэлбі, а ў 2003 годзе прайшоў поўную рэстаўрацыю. Shelby Cobra Daytona неаднаразова ўдзельнічаў у шоу і гонках рарытэтных аўтамабіляў.