Ва Украіне анансавалі ўдары балістычнымі ракетамі па Маскве

• 28.07.2026, 14:48

Ужо восенню.

Узброеныя сілы Украіны (ЗСУ) могуць пачаць наносіць першыя ўдары украінскімі балістычнымі ракетамі па Маскве ўжо гэтай восенню, заявіў уладальнік і галоўны канструктар кампаніі Fire Point Дзяніс Штылерман. У інтэрв’ю журналісту Дзмітрыю Гордону ён паведаміў, што цяпер ідзе завяршальны этап выпрабаванняў новай ракеты. Пасля тэставых палётаў «ужо пачнуцца палёты на тэрыторыю Расіі». «Вайскоўцы будуць вызначаць, куды, але, думаю, гэта адразу будуць нейкія значныя мэты», — сказаў Штылерман.

Пры гэтым ён адзначыў, што дакладныя тэрміны паступлення балістычных ракет на ўзбраенне ўкраінскай арміі будуць залежаць ад вынікаў выпрабаванняў рухавіка. «Мы зальём рухавік, паставім яго на стэнд, правядзём пражыг і паглядзім, як ён адпрацуе. Калі будуць нейкія недакладнасці, будзем усё гэта выпраўляць. Але мы робім усё вельмі хутка», — дадаў Штылерман.

Кампанія Fire Point з’яўляецца адным з буйнейшых падрадчыкаў украінскай арміі. У прыватнасці, яна вырабляе далёкабойныя ўдарныя беспілотнікі FP-1 і крылатыя ракеты FP-5 «Фламінга». Пра распрацоўку балістычных ракет FP-7 і FP-9 кампанія афіцыйна абвясціла ў верасні 2025 года. У лютым яна паказала першы тэставы запуск FP-7. Паведамлялася, што ракеты FP-7 разлічаныя для ўдараў на адлегласць да 250–300 км, а FP-9 — да 850 км.